Fushata ka filluar dhe partitë politike kanë shfrytëzuar çdo mjet për ta bërë atë gjithëpërfshirëse dhe populiste.
Akuzat se mjetet dhe personeli i administratës shtetërore po përdoren për qëllime fushate, vetëm një muaj përpara zgjedhjeve vendore, kanë ndërgjegjësuar disa institucione.
I pari që ka lëshuar një urdhër për këtë mospërfshirje ka qenë Drejtoria e Përgjithshme e Burgjeve.
Në urdhrin e Brendshëm të Drejtorit të Burgjeve, që Ora Neës ka mundur të sigurojë, Artur Zoto i drejtohet të gjithë Drejtorive të burgjeve si dhe paraburgimeve.
Me anë të këtij dokumenti, Zoto i komunikon çdo punonjësi të administratë së burgjeve, duke paralajmëruar se në rast të konstatimit të përfshirjes në fushatë, ata do të rrezikojnë vendin e punës.
I njëjti urdhër është firmosur edhe për punonjësit e policisë së burgjeve, të cilët garantojnë sigurinë në institucionet e ekzekutimit të vendimeve penale.
Sipas Zotos, ky urdhër ka për qëllim të mbajë punonjësit e administratës larg përfshirjes në fushatën politike.
Rastet e mëparshme kanë treguar që administrata publike është përdorur në fushatë, një e vërtetë e cila është emetuar edhe nga vëzhguesit ndërkombëtarë si një problem shqetësues.