Dule: Kemi katër opsione për aleancat parazgjedhore

I pyetur në emision Tonight Ilva Tare për aleancat e mundshme parazgjedhore që mund të krijojë PBDNJ, zoti Vangjel Dule është shprehur se kanë në tavolinë katër opsione ku mund të zgjedhin

Duke patur një elektorat të përqëndruar në disa qarqe dhe konkretisht për nga dëndësia e influencës, duke u nisur nga Vlora, Gjirokastra, Korca dhe Tirana nuk përjashtojmë në asnjë rast edhe opsionin e kandidimit të pavarur. Është një variant shumë i zorshëm nga ana e matematikës elektorale por jo i pamundur. Nuk na garanton një rol të madh në jetën parlamentare porn a garanton mbijetesën parlamentare në një masë të konsiderueshme

E dyta do të ishte një arritje marrëveshjeje ose koalicioni që nuk ka ekzistuar me PS, por që nëpërmjet dialogut mund të arrihet, deri në skadimin e afatit ligjor për mënyrën e kandidimit.

Varianti i tretë do të ishte një bashkepunim në qendër, që mund të ishte LSI, FRD, forca të tjera politike, gjithmonë nëse kanë marrëdhënie të mira me shtetin e së drejtës dhe vizionin Europian

Variant ii katërt mund të ishte bashkërendim veprimesh pa bashkëpunime të drejtpërdrejta, me një bashkëpunim të tërthortë, si me PS ashtu dhe me forca të tjera duke orientuar influencën tonë elektorale në shumicën e qarqeve pa pretendime mandate dhe duke marrë në këmbim një influencë elektorale për të fuqizuar variantin tonë të parë në ato qarqe ku ne e kemi këtë influencë dhe që do të na e bënte më të sigurtë fitimin e mandatit”- tha z.Dule.

Ndërkohë midis këtyre opsioneve, kur iu përmend partia Aleanca Kuqezi, ai ka thënë se do të bëjë koalicion me parti që kanë marrënie të mira me shtetin ligjor, duke lënë të kuptohet se AK është parti që ka shkelur ligje.