Partia Demokratike denoncoi një tjetër tendër në Ministrinë e Shëndetësisë, duke akuzuar ministrin Ilir Beqaj se ia ka dhënë ato mikes së kryeministrit.
Sekretarja e Marrëdhënieve me Publikun, Grida Duma tha se tenderat i janë dhënë për blerje ilaçesh.
“Prej dy vitesh Ilir Beqja shpall fituese kompaninë TRIMED. Nëse shfletoni këto faqe tenderash, ju do shihni këtë emër. TRIMED, TRIMED fituese. TRIMED, firma e shoqes Nushi, ka fituar pafundësisht tendera, në ministri, në spitale, në Tiranë në rrethe. Shuma e përfituar është mbi 2 milionë e 100 mijë euro. Një pjesë e mirë, e këtyre milionave është marrë pa tender”, deklaroi ajo.
Duma tha se paratë janë marrë me negocim për shkak se fituesja është donatore e Partisë Socialiste.
“Edhe pse kjo zonjë ka dorë kudo, në dogana, në mobilime zyrash, edhe pse mori koncesionin e chek-up prej 120 milionësh, mikes së kryeministrit i duheshin dhënë edhe ca miliona të tjera me ilaçet. Ky është shteti i Edi Ramës. Shtet i krimbur në korrupsion. Shëndetësia e Beqajt është vetë kanceri i shtetit”, tha më tej. /Dita/