Duma: Shqipëria, si Sodoma dhe Gomorra

Dasma e Sinan Hoxhës dhe bashkëshortes së tij Andrrës, ka marrë edhe vëmendjen e koordinatores së PD­së Grida Duma, në lidhje me shpenzimet marramendëse që u bënë.

Grida Duma ka botuar një shkrim të gjatë dje. E nis me krizën e emigrantëve, pastaj vazhdon merret me Ramën dhe në fund s’merret vesh se çfarë ka dashur të thotë. Por, në një pjesë të shkrimit ajo thotë se Shqipëria është kthyer si Sodoma dhe Gomorra. Nuk dihet se në ç’kontekst e thotë këtë, sepse dhe vetë nuk e shpjegon mirë. Ja një pasazh nga shkrimi i stërgjatë i saj botuar në shtypin e ditës. “Europa po pëson një dyndje që e çon në gjendje emergjence dhe mbarë opinioni po gjykon atë, Europën.

Si gjithmonë në histori, peshën e gjykimit duhet ta mbajë pikërisht kush i ndërton standardet.

Po gjykohet Europa! Ndërsa Siria, ashtu si Shqipëria, shquhet për tolerancën fetare – më të ndërlikuar, më të vështirë, më të lashtë se e kujtdo populli tjetër; kishat dhe xhamitë e saj ngrihen pranë e pranë, ndajnë të njëjtin ajër me tempujt e mahnitshëm të lashtësisë, sot përballet me shkatërrimin total.

Përballë kësaj katastrofe, ajo që lexojmë sot për Shqipërinë dhe Kosovën është e denjë për një reportazh tragjikomik për Sodomën dhe Gomorrën: nuse që shkojnë nëpër dasma me helikopterë, refugjatë që udhëtojnë me autobusë. Bashki shqiptare që dënojnë me ashpërsi jezuite urinuesit e jashtëligjshëm.

Qytetarë që s’pranojnë të vënë kafe në gojë pa marrë në dorëzim kuponin tatimor, ndërsa bukën e blejnë me listë. Të inkriminuar që votojnë njëzëri në Parlament pro reformës në Drejtësi. Ndërsa në Vjenë, Kryeministri i Shqipërisë shpall se mirëqenia e Ballkanit s’do t’i kushtonte Europës as zero pikë zero diçka” – shkruan Duma. Uffa, sa e bukur është kjo Grida.