Prej pesë ditësh vijojnë kërkimet për gjetjen e dy peshkatarëve të zhdukur gjatë pasdites së 4 janarit në plazhin e Durrësit. Edhe gjatë ditës djeshme anijet “Lissus” dhe “Iliria”, ndodhen në gjirin e Durrësit dhe në Gjirin e Lalzit, të angazhuara në operacionin e kërkim shpëtimit të dy peshkatarëve, Avni Shahinaj, 42 vjeç dhe Bekim Mançina, 30 vjeç. Edhe Policia Kufitare e Portit të Durrësit po vijon kërkimet e dy peshkatarëve me mjetet e saj lundruese, por edhe një helikopter ushtarak. Dy peshkatarët humbën pasditen e 4 janarit, kur dolën me vrakë për të mbledhur rrjetat.