Dy të dyshuar të arrestuar për vrasjen e opozitarit rus, Boris Nemtsov

Dy të dyshuar u arrestuan sot në Rusi në kuadër të hetimit për vrasjen e opozitarit Boris Nemtsov, vrarë më 27 shkurt pranë Kremlinit, njoftoi shërbimi federal i sigurisë ruse (FSB).

“Dy të dyshuar u arrestuan sot për vrasjen e Boris Nemtsov, Anzor Gubachev dhe Zaour Dadaïev dhe presidenti është informuar”, deklaroi për televizionin shtetëror kreu i FSB-së, Alexander Bortnikov.

”Dy personat janë me orogjinë nga Kaukasi”, theksoi ai duke shtuar se hetimi po vazhdonte.

Vrasja e Boris Nemtsov, një prej opozitarëve më të ashpër të presidentit, Vladimir Putin dhe i njohur gjithashtu për luftën e tij kundër korrupsionit, tronditi vendin.

Putin e cilësoi vrasjen e tij si ”provokim” që parashikonte destabilizimin e vendit dhe premtoi se vrasësit do të dilnin para drejtësisë.