E çfarë i duhet fshatit se po grinden dy vëllezër?

Nga Bedri Islami

Botuar në DITA

Sali Berisha, ashtu si ishte paralajmëruar që prej ditësh, dje në drekë, në kohën e zgjedhur prej tij, në krye të një grupi militantësh, deputetë të opozitës, pjesë të grupit të Rithemelimit, të inkriminuar, pjesë të dikurshme të forcave të rendit, marshoi drejt selisë së Shqup-it, pikërisht drejt godinës që e uzurpoi sapo humbit zgjedhjet politike të vitit 2013.

Brenda selisë ishte pjesa tjetër e opozitës, tashmë drejtuar nga Basha, që, pasi kishte siguruar vulën, procesverbalet, kishin përjashtuar nga funksionet disa drejtues të strukturave të larta dhe të nivelit të dytë, pasi kishin shpallur “hiç“ çfarë kishte ndodhur në 11 dhjetor, po bëhen gati për 18 dhjetorin e tyre.

Gallatë e pashoqe. Njëra palë që thërriste „duam babën“, pala tjetër që priste sa të largoheshin dumbabistët, për të shprehur adhurimin për dumbashistët.

Zyra të mbyllura, karrike të hequra, salla të boshatisura, njerëz të trembur që iknin sapo shikonin turmën, turma vetë e ngazëllyer, sikur po prekte pushtetin, militantë të opozitës së “vulave“ që bënin thirrjet “SOS“ për ndihmë, se po mbytet “Titaniku“ i bardhenjve; lideri i vjetër triumfalist, por edhe i trembur, sepse e dinte mirë se çfarë dimri vjen prapa; lideri i ri tetëvjeçar i strukur, ngazëllim e trishtim, njerëz me armë në brez dhe figura të panjohura, militantë që nuk e dinë as vetë se çfarë duhet bërë, të rinj që shikojnë pushtetin në ëndrrat e tyre, opozitarë zyrtarë që bëjnë gati fjalimet e ardhshme të shefit të tyre, kaos, britma, akuza të ndërsjellta, fytyra të vrerosura, njerëz që ulen dhe ngjiten deri në katin e dytë të shqup-it duke pritur përzënien e liderëve të “vulave“, të tjerë që i shikojnë deputetët e “foltores“ si të ishin makthet e së djeshmes, rrëmujë, gallatë.

Në fakt, kjo është Partia Demokratike sot, e jo vetëm sot. Një parti me kryetarë të rrahur e të thyer brinjësh, si tha aktuali i sapo shkarkuar, me ish komunistë legenë, me oligarkët e krimit që ndërruan ngjyrë sapo u iku pushteti, me figura të rëndësishme politike që në vitin 2005 erdhën me pantallona të grisura dhe u bënë milionierë – thënie e Bashës dhe i besoj se është vetë njëri prej tyre si pjesë e qeverisë në tri dikastere; me hajdutë pa skrupull, dhe, mjerisht, me njerëz që besojnë sinqerisht se janë në të mbarën e rrugës së tyre. Këto të fundit janë të paktë, por asnjëra palë nuk i do, bëjnë sikur i duan, por mezi presin deri kur të ikin.

Sepse antivlera, jo vlera është aty. Sepse vjedhja, jo ndershmëria quhet virtyt. Sepse korrupsioni masiv është shfaqje e mençurisë, jo prosperiteti i shtetit.

Basha ndjehej triumfator pasi me një Këshill Kombëtar të përgjysmuar shkarkoi nga detyra 11 kryetarë degësh që nuk shkuan pas thirrjes së tij; Berisha përjashtoi gjithë kryesinë dhe e shpall Këshillin Kombëtar të pavlefshëm; deputetët që morën pjesë në kuvend – mitingun e Berishës janë të përjashtuar nga funksionet, por do të jetë deputetë të Grupit Parlamentar të opozitës; struktura që hedhin në gjyq njëri tjetrin për vula, stema, flamuj, këngë, thirrje, sharje, kur asnjëri nuk përfaqëson misionin për të cilin u mendua se u ngrit forca e parë politike e opozitës.

Asnjëherë më parë Basha nuk shfreu dufin e tre muajve, grumbulluar brenda vetes, dhe inatin e 8 viteve nën hijen e “atit politit”, se sa pas 3 orëve mbyllje si nën rrethim. E quajti si askush më parë. Edhe Pollo i ka thënë hajdut, por Basha shkoi edhe më tej. Ai hapi defterët e vjetër dhe, në një çast ngazëllimi hapi fillin e një ngjarje vrastare: 21 janarin. Ai bëri përgjegjës direkt Berishën për ngjarjen dhe ky është zhvillimi më i rëndësishëm i kësaj dite.

Apo fillon të shthuret enigma e vrasjeve të 21 janarit. Kush është horri, trafikanti, hiçi që nëpërkëmb dinjitetin e demokratëve, sipas Bashës? Kush është frikacaku që ngutet?

Ja edhe thënia e Bashës, dje më 13 dhjetor 2021: “PD ka qenë dhe është e gatshme të përballet me çdo situatë. Në miniaturë Berisha kopjoi skenarin e Tom Doshit në 21 janar, por unë nuk u përgjigja, siç u përgjigj Berisha në 21 janar. Ne do ruajmë qetësinë, por do kemi vendosmërinë për të ruajtur interesin e demokratëve, por duke mos lejuar asnjë horr, trafikant, asnjë hiç të vijë këtu për të marrë nëpërkëmbë dinjitetin e demokratëve. Për këtë të jeni të sigurtë. Ju e patë ndërkohë që ata bënin si gorilla jashtë ne vazhdonim mbledhjen. Ngutet frikacaku dhe ngutja e frikacakut i ka kushtuar PD-së në 30 vite”.

Faji u bë qyrk i florinjtë e nuk e veshi njeri. As Basha nuk do e veshë pjesën e fajit të tij në 21 janar, kur ishte ministër i brendshëm. Edhe ai duhet të sqarojë përse nuk u zbatua kërkesa e prokurores së përgjithshme për ndalimin dhe hetimin e rrethit komandues të gardës së Republikës, ku ishin edhe vrasësit. I duhet të sqaroj se kush qëlloi me armën e Komandantit të Gardës.

Kush i fshiu pamjet e serverit të kryeministrisë natën e 21 janarit? Përse njeriun përgjegjës e bëri deputet dhe është përsëri i besuari i tij? Lëmshi do të zgjidhet. Sapo filloi.

I ka thënë nga vetja Basha këto fjali, apo i kanë thënë t’i thotë, kjo nuk do të jetë enigmë edhe për shumë kohë. Të tjerat janë brenda vetes.

Askush nuk e di se si do i ndajnë pulat apo gjelat mes tyre, vilat e pasuritë, militantët dhe oligarkët. Ata ia dinë të gjitha njëri tjetrit. Deri në thelbin e tyre. Ia dinë mizoritë dhe plaçkitjet.

Dinë se si u vodh Rruga e Kombit dhe si u ndanë ato, çfarë ndodhi me 21 janar dhe kush dha urdhër të që vriten njerëz, ia dinë masakrat zgjedhore brenda vetes dhe në vitin 2009, si janë përdorur njësitet speciale, kur ishin në pushtet dhe në opozitë, tentimin e fundit e bëri Bardhi i Kavajës; dinë të fshehtat e Gërdecit dhe lidhjet me rusët e firmave të zeza, lobimet që kanë bërë dhe planet e fshehta.

Dinë gjithçka dhe, sa më shumë ditë të rrjedhin, aq më shumë do të dinë njerëzit. Prisni dhe do të habiteni. Lufta për pushtet tani është luftë për mbijetesë dhe kjo është më e egra, sidomos kur është brenda llojit.

E çfarë i duhet fshatit se po grinden dy vëllezër?

Kujt i hyn në punë se cili prej tyre drejton opozitën? Njëri, si tjetri. Bashkë në gjithçka. Tani do të fillojnë të ndajnë sahanët, lugët, pirunjtë, thikat, por të gjitha janë të florinjta. Super të pasur, arrogantë ndaj pushtetit dhe përbuzës ndaj njerëzve; banues në vila dhe të errët në historinë e tyre para politike; të dy të lidhur me fije të dukshme dhe të padukshme me struktura të shtetit serb, eminencë gri e një politike ndarëse, të ardhur drejtpërdrejtë ose tërthorazi nga komunizmi; të fshehtë në rrugëtim dhe të gatshëm të përplasen deri në rrënjë për veten e tyre.

Marshimi i Berishës, aq sa ishte grotesk, aq ishte edhe tragjikomik. Parapërgatitja e Bashës, duke u vënë çelësat zyrave apo hequr karriget nga sallat e mbyllura ishte po aq komike e tragjike në të njëjtën kohë.

Deklarimet e Berishës të sotëm ndaj Bashës janë shenja se cilin kishte vendosur të drejtojë opozitën. Një riosh, i cili e kishte mësuar më herët besëprerjen.

Deklarimet e Bashës ndaj Berishës dëshmuan se cili ka qenë lideri që ka drejtuar me dorë të hekurt opozitën e qeverinë dhe çfarë ishte në gjendje të bënte nëse lëkundej pushteti.

Tetë vite sollën kaosin. A mund të drejtojë njëri prej tyre apo të dy së bashku Shqipërinë?

Ata i tregojnë njëri tjetrit rrugëtimet e krimit që kanë bërë sëbashku, përplasen kur lëkundet karrigia, dëshmojnë për krimet që kanë bërë, sëbashku apo veç e veç, manipulojnë votimet edhe brenda vetes, fshihen pas vulave, stampave, logove, thërrasin armët dhe në fund, në çallti e sipër tregojnë edhe për krimet e përbashkta, si ndodhi në 21 janar.

Grindjet e tyre brenda shtëpisë përbëjnë ngjarje, por kujt i interesojnë më tej se kaq. Shumë, ndoshta të gjithë e kanë ditur se kush janë. Kur e kanë thënë të tjerët, nuk i kanë besuar.Tani ia thonë njëri tjetrit. Dhe është vetëm fillimi.

Në zjarrminë e ti pas marshimit të Berishës, i çliruar se nuk ndodhi asgjë tjetër, Basha deklaroi se:

“Do të ecim përpara pa u ndaluar nga ish-komunistët…Sali Berisha e nisi si njëri me dy tesera partie në xhep dhe po e mbyll si një non grata. Kemi shkelur mbi standardet tona për t’i ruajtur fytyrën. PD do të çlirohet nga Sali Berisha dhe gorillat e tij. Këtë thirrje kam për Sali Berishën; hiq dorë nga të qenët tub oksigjeni për Edi Ramën. Koha kur sallat e këshillave kombëtar ishin arenë rrahjesh ka marrë fund“.

Vërtet kanë marrë fund? Edhe më dy prill thoshit kështu… Mjerë kush ju beson!