Turqia drejt mbylljes së ngushticave për marinën ruse, Von der Leyen: “E duam Ukrainën në BE, por tani s’mundemi”

Ukraina është “një prej nesh dhe ne e duam në Bashkimin Evropian”. Kështu është shprehur pasditen e së dielës Ursula von del Leyen, presidentja e Komisionit Evropian.

Ajo foli pasi Brukseli njoftoi se po dërgonte armë në Ukrainë dhe se do të ndalonte transmetimin e mediave të mbështetura nga Rusia në BE.

Por, pavarësisht se mbështeti Ukrainën për anëtarësimin në BE, Von der Leyen nuk dha asnjë shenjë se mund të bëhej një anëtarësim i përshpejtuar ashtu siç është kërkuar nga presidenti Volodymyr Zelenskyy të shtunën.

“Ne kemi një proces me Ukrainën. Duhet fillimisht integrimi i tregut ukrainas në tregun tonë të përbashkët. Kemi bashkëpunim shumë të ngushtë në rrjetin e energjisë, për shembull.  Ka shumë tema ku ne punojmë shumë ngushtë së bashku. Në të vërtetë, ata janë një nga ne dhe ne duam që ata të anëtarësohen”.

Von der Leyen tha gjithashtu se besimi tek Vladimir Putin është “i thyer plotësisht”.

Ndërkohë, Turqia ka thënë se do të zbatojë kushtet e një marrëveshjeje ndërkombëtare që mund ta bëjë atë të bllokojë hyrjen në Detin e Zi për Marinën Ruse.

Sipas Konventës së Montreux të vitit 1936, Turqia ka kontroll mbi dy ngushticat që lidhin Detin e Zi, i cili ndodhet në bregun jugor të Ukrainës, me Mesdheun.

Konventa garanton kalimin e lirë të anijeve që i përkasin vendeve të Detit të Zi – si Rusia – në kohë paqeje, por i lejon Turqisë të mbyllë ngushticat për të gjitha anijet luftarake të huaja në kohë lufte, ose nëse vetë Turqia kërcënohet.

i.b. / dita