E fundit: Kreshnik Spahiu, mesazh Edi Ramës

“Shiko Edi, atëherë po e lëmë me tre, dakord?” Ky ishte mesazhi që kryetari i Aleancës Kuqezi Kreshnik Spahiu, i dërgoi javën e kaluar kryetarit të PS-së Edi Rama. Gojët e liga kanë mësuar se në një kthesë të çuditshme mentale, Spahiu vazhdoi negociatat për koalicion zgjedhor me socialistët, aty ku i kishte lënë fiks 3 vjet më parë, në prill 2013.

“Në fakt, gjashtë deputetët që kërkova janë shumë. Besoj se tre është shifër e arsyeshme”, vazhdoi arsyetimin e tij Niku, i bindur se asgjë nuk kishte ndodhur përgjatë këtyre tre viteve, ose ndoshta se kishin kaluar vetëm pak ditë nga biseda e fundit me Ramën.

“Ta thashë për gallatë atë punën e kandidates që ishte ashtu një muhabet i një shokut tim”, vazhdoi Spahiu, “ç’më di mua ti, karagjoz?”, vijoi politikani ekspresiv. I vendosur për të arritur një marrëveshje, por pa e humbur dinjitetin gjenuin që i buron nga Brenda, mësohet se Spahiu bëri një ofertë tjetër, edhe pse nga Rama nuk vinte asnjë përgjigje. “Mirë, dëgjomë me kujdes: Dua një deputet dhe tre zv.ministra”, shkroi tekst Niku. “Nuk më gjen më me këtë mendje”, shtoi ai.

Pas 5 minutash, Niku bëri ofertën e fundit: “Edi, këtë nuk ma refuzon dot: Më bëj drejtor të zjarrfikëses në Sazan dhe e mbyllim këtë negociatë”.

“Hej? Hë mo…”