FOTOT / E jashtëzakonshme: NASA zbulon ujë në Mars

Hulumtuesit e NASA-s kanë zbuluar rrjedha të ujit në planetin Mars gjatë muajve të verës, që shkojnë poshtë humnerës dhe të cilat zhduken kur moti ftohet.

Ky është lajmi i madh i bërë publik sot nga NASA

Në këtë mënyrë shkencëtarët thonë se janë rritur gjasat që në këtë planet të mund të ekzistojë “njëfarë jete”.

Më parë është spekuluar shumë për ekzistencën e ujit në planetin e kuq, por zbulimi i bërë publik sot ka rëndësi historike pasi që tashmë ky zbulim është fakt i kryer.

“Ky zbulim na jep një fokus në atë se ku duhet të fokusohemi për të kërkuar mundësi ekzistence të jetës”, ka thënë profesori i gjeologjisë planetare në Universitetin e Arizonës, Alfred S. McEwen.

Shkencëtarët kanë thënë se në sipërfaqen e planetit Mars, ka pasur ujë së fundmi, ku “së fundmi” nënkuptohet që kjo sasi e ujit që është gjetur tani, mund të mos ketë ekzistuar më herët. Përndryshe nuk do të kishte mundur të prodhohej kripa e hidratuar.

Përkundër asaj që Marsi biliona vjet më parë ka qenë i përmbytur nga ujërat e lumenjve, liqeneve dhe me gjasë edhe të një oqeani, gjetjet e fundit të ujit janë në sasi modeste.

Shkencëtarët kanë konfirmuar se edhe më parë kanë hasur në pjesë të lagura të sipërfaqes së marsit, mirëpo kanë qenë shenja jo premtuese.