E vërteta e fotos Nano-Berisha në Trieste

Ish-kryeministri Aleksandër Meksi ka reaguar në Facebook, për të sqaruar të vërtetën e fotos së shpërndarë në disa media dhe rrjete sociale, ku ai shfaqet në krah të ish-kryeministrave Fatos Nano dhe Sali Berisha, si dhe Mentor Çoku, që u bë i njohur në vitet ’90 si interlekutor.

Sipas Meksit, në media dhe rrjetet sociale është shkruajtur se së bashku me tre ish-zyrtarët e lartë të vendit, ndodhet në foto edhe Sulo Gradeci dhe jo Mentor Çoku.

Kjo e pavërtetë e ka nervozuar ish-kryeministrin aq sa ka reaguar edhe kundër gazetës “Koha Jonë”. Meksi sqaron se foto është bërë në Trieste të Italisë në vitin 1992, ku ai së bashku me Berishën, Nanon dhe Çokun merrnin pjesë në një simpozium të Partisë Socialiste Italiane.

“Dikush, kujtoj mbiemrat Duli e Gjyzeli, kanë hedhur një foto në të cilën paraqitet: Fatos Nano, i ndjeri Mentor Çoku, Sali Berisha dhe Aleksandër Meksi.

Foto është bërë besoj nga Ylli Jasa që na shoqëronte në mars të vitit 1992 në Trieste ku merrnim pjesë në një simpozium të ftuar nga Partia Socialiste Italiane. Venesit në qarkullim të kësaj thonë se aty është jo Mentor Çoku por sigurimsi i njohur Sulo Gradeci.

Mbas kësaj jepet dhe shkrimi nga është marr nga e famshmja komuniste ‘Koha Jonë’, por si gjithnjë në punët e pista hidhet guri e dora fshihet, nuk firmoset nga autori, le ti hajë të sharat Nikolla, hudhësit në facebook bëjnë dhe ata komentet e tyre po aq të pafytyra.

Pastaj mos thoni pse nuk përparojmë”, shkruan Meksi.