Seks edhe në burg, shpërthime vrastare inati, maratona me alkoolin dhe drogën, një pasuri prej 300 milion dollarësh e çuar dëm nga një tendencë vetë-shkatërruese, jeta është një shaka për Mike Tyson, siç e pranon vetë në autobiografinë e tij, “Undisputed truth” (E vërteta e padiskutueshme), i cili do të dalë në shitje javën e ardhshme në SHBA. E përditshmja angleze “Daily Mail” publikon disa pjesë interesante. Në harmoni të plotë me personazhin, edhe historia e tij nuk mund të jetë veçse plot anekdota e kuriozitete të pabesueshme, duke filluar nga performancat seksuale në qeli me disa femra që e vizitonin në burg, përveçse lidhjes me pagesë me një asistente kundër drogës në burg, të cilës i kishte dhënë 10 mijë dollarë. Tyson tregon edhe për fëmijërinë e trazuar, shpëtimin që gjeti në ring e që e humbi pas vdekjes së Cus Damiko që më shumë se trajner e kishte lider shpirtëror. Pastaj rënia në vese, dhuna pa kufi, dënimi për përdhunimin e Desiree Washington dhe vitet në burg. Dhe kur doli jashtë tij, sipas vetë Tyson, dëshironte t’i këpuste kokën dikujt, ndoshta ish-promotorit Don King. Sot Tyson pohon se ka shpesh nostalgji për kohët kur i kalonte netët në klubet e natës, i shoqëruar nga femra dhe kokaina.