Eficenca e energjisë, Gjiknuri: Program konkret për uljen e konsumit

Energjia kryetema e qeverisë në nisjen e sezonit të ri të punës, ishe dhe qendra e fundjavës për ministrinë e kësj linje. Ministri i Energjisë dhe Industrisë, Damian Gjiknuri u shpreh dje se qeveria në të cilën bën pjesë ka një program konkret për uljen e konsumit të energjisë elektrike.

“Nuk ka dyshim se eficienca e energjisë është një prioritet i rëndësishëm si politik ashtu edhe ekonomik. Eficenca sot konsiderohet si një nga ato burime, akoma të pashfrytëzuara mirë, vërtet një burim alternativ energjie, në mënyrë indirekte. Kursimi i energjisë, do të thotë një përdorim më efikas, më eficient i energjisë, në mënyrë që për të njëjtin input, të keni më tepër output”, cilësoi ai. Sipas tij qeveria është e vendosur që paralelisht me luftën pa kompromis ndaj fenomenit të vjedhjes së energjisë, të ndërgjegjësojë opinionin publik për vlerën, avantazhet që sjell eficienca energjetike por dhe të promovojë politikat dhe investimet që shkojnë në këtë drejtim.

“Sot, ne përballemi me një nivel të lartë të humbjeve të energjisë, që janë humbje teknike ose jo teknike të cilat kryesisht vijnë nga abuzimi”, u shpreh ministri i Energjisë. “Në Shqipëri konsumojmë energji më tepër se ç’duhet. Nga viti në vit rritet kërkesa dhe përdorimi i energjisë, ndonjëherë në situate që nuk shkojnë në proporcion me rritje ekonomike”. Çrregullimi i tregut nga çmime të cilat nuk reflektojnë koston reale, i bën konsumatorët jo të interesuar drejt investimeve për një përdorim eficient të energjisë.

Ministri Gjiknuri këto deklaratë i bëri në konferencën me temë “Politikat e eficiencës së energjisë në Ballkan: Mundësi bashkëpunimi rajonal”. Konferenca u organizua nga Ministria e Energjisё dhe Industrisё sё Shqipёrisё dhe “Balkan Forum”, me mbёshtetje tё Rockefeller Brothers Fund.

Programi i qeverisë për kursimin e energjisë

.Përmirësim i mbledhjes së të dhënave të konsumit të energjisë nga të gjitha agjencitë e specializuara dhe të ngarkuara me ligj për këtë aktivitet.

.Do të miratohet një Plan-Veprim i qëndrueshëm në përputhje me direktivën e BE dhe udhëzimet e Komunitetit të Energjisë.

.Do të implementohen direktivat e BE për eficencën nëpërmjet transpozimit të normave dhe rregullave të BE në legjislacionin shqiptar.

.Nxitja e sektorit publik, që të marrë rolin e liderit në zbatimin e projekteve për eficiencën e energjisë, duke filluar që nga ministritë, spitalet, shkollat, institucionet e tjera publike.

.Aplikim i teknologjive të reja për përdorimin me eficencë të energjisë.

.Do të miratohet dhe forcohet kodi i ndërtimit si dhe aplikimi i standardeve të reja për efiçencën për pajisjet dhe aparaturat e tjera elektroshtëpiake.