Egjipti njeh pavarësinë e Kosovës

 Në ditën e pesëvjetorit të shpalljes së pavarësisë, Kosovës i vjen një lajm i mirë. Egjipti ka njohur pavarësinë e saj, duke u bërë kështu vendi i 99-të që e njeh atë si shtet.

Ndihmëspresidentja e Republikës Arabe e Egjiptit, Pakinam Hassan Khalil El Sharkawy, e cila ka mbërritur sot për një vizitë në Prishtinë, ka konfirmuar vendimin e shtetit të saj si dhe të Presidentit të Egjiptit, Mohamed Morsi, për njohjen e Republikës së Kosovës.

“Jam shume e lumtur që jam në Kosovë për herën e dytë. Kosova përfaqëson një simbol të lirisë duke qenë vendi më i ri demokratik në botë. Që nga revolucioni kemi pas shumë vizita të ndërsjella me Kosovën, së fundi nga Thaçi në konferencën e vendeve islamike me qëllim përforcimin e marrëdhënieve tona në të ardhmen. Egjipti e mbështet Kosovën. Jam e nderuar të shpalli njoftimin se Egjipti po e njeh Kosovën. Kjo njohje do të na ndihmojë në bashkëpunimin tonë në shumë fusha sepse kemi një të kaluar të përbashkët si në aspektin kulturor dhe historik”, deklaroi Sharkway në konferencë për media.