Ekonomi i përgjigjet PD: Ende asnjë marrëveshje për Karpenin

Ministria e Ekonomisë e konsideron si dashakeqe dhe dëmtim të imazhit të Shqipërisë deklaratën e opozitës në lidhje me projektin për portin e Karpenit në Kavajë. Në reagim thuhet se nuk është lidhur ende asnjë kontratë me kompaninë dhe se po negociohet. Ministria sqaron se investimi është kompleks, pasi përkrah portit do të ndërtohet edhe një termocentral si dhe një zonë ekonomike mbështetëse, ndërsa vota në Parlament sipas deklaratës është vetëm për të negociuar.

“Duke marrë parasysh kompleksitetin e këtij projekti, ndërtimi i portit, ngritja e një zonë ekonomike mbështetëse, dhe ndërtimi i TEC-it, por edhe për madhësinë e investimit, tre ministritë, MZHETTS, MEI dhe MTI,  kërkuan që Parlamenti t’i  japë të drejtën vetëm për të negociuar.

Theksojmë që nuk është lidhur asnjë kontratë me propozuesit e projektit. Qeveria shqiptare thjesht i ka kërkuar Parlamentit lejen për të hyrë në bisedime me propozuesit e investimit strategjik dhe për të negociuar kontratën, sipas ligjit në fuqi për këtë investim: më i madhi këto 25 vitet e fundit në Shqipëri, që do t’i hapi rrugën 70.000 vendeve të reja pune.

Kjo nënkupton një filtrim më të detajuar dhe mbi baza dokumentesh zyrtare, jo vetëm të “Star Bridge Port Development Limited”, por edhe të gjithë kompanive investuese e zbatuese të projektit”.

Më tej thuhet se ligji i miratuar nga Parlamenti parashikon edhe konsulencën e huaj.

“Theksojmë se, kjo konsulencë do të kryejë vlerësime ligjore dhe financiare për të arritur në një kontratë me garanci sa më të forta për shtetin shqiptar. Kontrata do të përfshijë detyrimet kontraktuale, garancitë financiare, sanksione në rast të mosrealizimit të projektit sipas kontratës, afate detyruese dhe përgjegjësi të tjera.

Reputacioni dhe eksperienca e kompanive, amerikane, angleze dhe turke,  investuese dhe zbatuese, që do të implementojnë projektin nëpërmjet “Star Bridge Port Development Limited”, është një garanci më shumë dhe shtysa kryesore që na ka çuar të ndërmarrim këtë iniciativë.”, thuhet më tej.

Për sa i përket vlerës prej 100 stërlinash që zotëron kompania, ministrja Ekonomi shprehet se kjo është vlera e regjistrimit në Mbretërinë e Bashkuar.

“Në çdo rast, para nënshkrimit të kontratës, “Star Bridge” do të regjistrohet si SPV sipas parashikimeve të legjislacionit shqiptar dhe do të ofrojë të gjitha garancitë e nevojshme të performancës. Aktualisht, për Qeverinë Shqiptare nuk ka asnjë risk. Nuk ka asnjë marrëdhënie juridike formale të lidhur me ndonjë subjekt, përfshi edhe “Star Bridge”. Ligji është vetëm leja formale e fillimit të negociatave, dhe si asnjëherë më parë, e bën transparent procesin e këtij investimi, nga fillimi e deri në fund”, thuhet më tej.