ZGJEDHJET / Emrat e këshilltarëve vulosen nga Basha

Kryetari i PD-së, Lulzim Basha, do të vendosë për listat e këshilltarëve për 61 bashkitë e vendit.

Kjo është bërë e qartë në udhëzimin e lëshuar nga vetë Basha për degët e PD-së, të cilëve u kërkohet hartimi me konsensus të tyre, por në fund fare do të jetë vetë kryedemokrati që do të vendosë.

PD-ja duhet të përpilojë listat me 1576 emra kandidatësh për këshilltarë.

Listat do të kalojnë përmes një filtri të posaçëm që përfundon te zyra e kryedemokratit, raporton Shqip.

Në udhëzimin e lëshuar gjashtë ditë më parë, Basha i kushton vëmendje dhe çështjes së dekriminalizimit.

Partia Demokratike u kërkon degëve të saj që në formularin e listës shumëmerore të këshillave bashkiakë, anëtarët demokratë të shprehen nëse kanë qenë të dënuar më parë apo kanë ndonjë proces gjyqësor.

Kjo është një nga kërkesat e urdhrit të lëshuar nga ana e Bashës.

Kjo kërkesa për këshilltarë duket paksa ironike në fakt, duke qenë se Basha ka disa kandidatë për kryebashkiakë që kanë problem me ligjin dhe janë dënuar apo janë nën hetim.