Emrat e përgjuar nga SHISH, në rrjetë kundërshtarë të Berishës dhe “armiq të partisë”

Prej tre javësh DITA i ka sjellë lexuesve të saj detajet sekrete të raportit të komisionit hetimor për SHISH. Raporti nxjerr në dritë përgjimin e personave me imunitet, ose e thënë më thjeshtë deputetëve të opozitës së djeshme, liderit të opozitës Edi Rama, apo aleatit të dikurshëm në qeveri të Sali Berishës, Ilir Meta e madje edhe ministrave të kabinetit të kaluar qeveritar e deri ambasadorë që kanë zhvilluar apo zhvillojnë ende aktivitetin në Shqipëri. Pasi publikuam të dhëna nga raporti, emrat të cilët kanë qenë viktimë e përgjimit dhe ndërhyrjen e një ambasade të një vendi mik që mos të vijohet me këtë historinë e përgjimeve, çka detyroi kryeministrin dhe kreun e Kuvendit të mos bëjnë asnjë deklaratë publike për këtë çështje, mbrëmjen e djeshme dy televizionet kryesore në vend kanë vendosur t’i futen kësaj historie duke i dhënë hapësirë të rëndësishme. Televizioni Top-Channel vendosi që lajm kryesor të edicionit qendror të vendoste përgjimin, ndërsa TV Klan i kushtoi emisionin Opinion, raportit të komisionit parlamentar. Në emisionin e Fevziut kishin konfirmuar pjesëmarrjen edhe deputetë të të dy palëve, por që janë tërhequr në momentin e fundit sipas drejtuesit të emisionit. Nga lista e emrave që janë përgjuar bie në sy fakti se figurojnë kundërshtarë politikë të Sali Berishës por dhe njerëz që janë parë si armiq të partisë brenda PD-së.

Raporti për përgjimet sipas TCH

Top Channel ka mundur të sigurojë nga burime jozyrtare të dhëna nga raporti që është lexuar pak javë më parë në Komisionin parlamentar të Sigurisë dhe më specifikisht atë pjesë që ka të bëjë me përgjimet. Por si është realizuar përgjimi i personave me imunitet? Cili ka qenë mekanizmi dhe teknaliteti ligjor për të arritur deri tek deputetët, ministrat e madje edhe ambasadorët? Nga raporti rezulton se këta persona nuk janë përgjuar direkt, por janë vendosur në përgjim duke marrë miratimin nga prokuroria të personave të tretë. Këta janë persona të zakonshëm, por të njohur për komunikimet e shpeshta për arsye të ndryshme me deputetë apo ministra. Në këtë mënyrë, nga përgjimi i të tretëve është arritur të përgjohet edhe aktiviteti i personave me imunitet. Ajo që e bën të dyshimtë sipas deputetëve të gjithë këtë procedurë është fakti se rezultatet e përgjimeve të këtyre bisedave nuk u janë dërguar sektorëve përkatës operativë, të cilët kanë kërkuar vendosjen në përgjim. “Bisedat e personave me imunitet në përgjithësi përmbanin elementë të përditshmërisë së tyre dhe janë printuar jashtë formatit standard të miratuar, në mënyrë të parregullt, të pa normuar në aktet nënligjore, të paregjistruara dhe të pa firmosura nga askush”, citohet të jetë shkruar në raport. Prandaj, deputetët që kanë ushtruar kontrollin thonë se nuk ka qenë personi i vënë në përgjim vetëm objekti i punës së SHISH, por edhe ata me imunitet, sa kohë që këto regjistrime janë ende pjesë e memories së aparaturave përgjuese. Sipas tyre, nëse objekt i punës së drejtorit të SHISH do të ishte personi i vënë në përgjim, atëherë materiali i printuar duhej të përmbante nuanca të një veprimtarie që cenon sigurinë kombëtare dhe përgjimi duhej t’i kalonte direkt sektorit që kishte bërë kërkesën. Por ka ndodhur e kundërta. Sipas raportit, “Përgjimi është printuar në një format jashtë standardit të miratuar dhe që lidhet me aktivitet private apo politike të deputetit”. Sipas dokumentit, janë me qindra rastet e përgjimeve të tilla, për të cilat është në dijeni edhe drejtori i SHISH, Visho Ajazi. “Këto informacione janë printuar e përdorur në kundërshtim me standardin e miratuar dhe nuk janë të regjistruara në asnjë regjistër, sikundër ndodh me informacionin zyrtar të përgjimeve”, citohet raporti. Më tej, në të kërkohet nga drejtori i shërbimit sekret që mbi bazën e detyrimit ligjor të sqarojë se cili ka qenë destinacioni i këtyre informacioneve, ku janë administruar dhe si janë asgjësuar ato.

Përgjimet në “Opinion”

Sipas raportit të cituar nga burime të besueshme, deputetët kanë gjetur gjurmë përgjimesh dhe madje edhe tekste të zbardhura të tyre. Përgjimet, kanë përfshirë brenda tyre edhe numra dhe emra personash të rëndësishëm ose ndër më të rëndësishmit e politikës shqiptare. Po sipas të njëjtave burime që i referohen Raportit, ndër emrat që figurojnë të përgjuar janë edhe ata të Kryeministrit aktual Edi Rama, të Kreut të Kuvendit Ilir Meta, të Kreut të Opozitës Lulzim Basha dhe të disa personazheve të tjerë të rëndësishëm të shtetit dhe politikës. Po si janë kryer përgjimet? Kush i ka autorizuar ato dhe a mund të përgjohen persona që kanë imunitet ligjor? Pra a kanë qenë këto përgjime politike apo përgjime si pasojë e angazhimeve të tjera të këtyre personave. Hetimi paraprak i komisionit sqaron disa detaje që janë tejet të rëndësishme për hetimin. Sipas burimeve që i referohen raportit dhe punës së komisionit, ka disa gjëra që dalin nga kontrolli. Së pari, të gjitha hetimet e shqyrtuara nga përfaqësuesit e Parlamentit figurojnë si “përgjime parandaluese”. Përgjime të tilla nisin mbi bazën e një indicieje që vjen nga një prej agjencive shtetërore të inteligjencës që ka për qëllim parandalimin. Të gjitha këto përgjime, nuk kanë nevojë për vendim gjykate dhe nuk përdoren si provë në gjyq! Ato shërbejnë për parandalimin e një krimi emergjent. Sipas rregullores, transkriptet e këtyre përgjimeve shkatërrohen brenda 7 ditëve! Së dyti, të gjitha përgjimet janë bërë me autorizim të Prokurorit. Nuk figuron së paku nga hetimi i deritanishëm asnjë përgjim i paautorizuar nga prokuroria. Së treti, sipas të njëjtit burim, nën përgjim figurojnë emra të njohur të mediave, figura periferike të politikës dhe Ambasadorë të huaj. Përgjimi i tyre ka qenë konform ligjit dhe i autorizuar nga Prokurori, por gjatë komunikimit, personat e përgjuar kanë pasur komunikime aktive me njerëz të rëndësishëm me imunitet. Në këtë rrjetë kanë rënë njerëzit më të rëndësishëm të vendit. Po i njëjti burim i besueshëm sqaron se Rama dhe Meta janë përgjuar duke komunikuar kryesisht me një pronar të rëndësishëm mediash; Basha nga komunikimi me një Drejtor të Bashkisë që ishte vënë nën përgjim dhe me të cilin ai kishte komunikim frekuent; ndërsa persona të tjerë të rëndësishëm si Nënkryetari i Kuvendit Dule apo ministra aktualë nga komunikime me persona më pak të rëndësishëm, por me të cilët ata komunikonin shpesh. Siç shprehet i njëjti burim, në bisedat mes tyre janë zbardhur dhe protokolluar edhe pjesët politike që s’kanë pasur lidhje me arsyen për të cilën janë vënë nën përgjim. Pra thënë ndryshe, pothuajse të gjithë personat që konsiderohen të përgjuar, janë përgjuar indirekt, nga bisedat me persona të dytë dhe asnjëri prej tyre direkt. Raporti nuk riprodhon zbardhje përgjimesh, edhe pse sqaron që një pjesë e këtyre i disponon aktualisht, por thjesht emrat e personave që janë përgjuar. Në fund të 5 faqeve të raportit, vijon një listë me emrat e identifikuar të personave me imunitet apo atyre publikë që kanë qenë nën përgjim pavarësisht se për sa kohë ka zgjatur ky përgjim. Sipas listës, figurojnë të përgjuar me më shumë apo më pak intensitet afro 25 deputetë të mazhorancës aktuale. Ajo që bën çudi është se në listë figurojnë edhe emra personash nga mazhoranca e djeshme. Veç Lulzim Bashës, të përgjuar figurojnë edhe Astrit Patozi, Ilir Rusmali dhe Sokol Olldashi. Po ashtu në listë janë disa emra shumë të njohur, investitorë të mediave apo gazetarë me ndikim në opinion publik, madje edhe emra Prokurorësh të përgjuar po me autorizim të Prokurorisë. Po sipas raportit, që e referon një burim i besueshëm, përgjimet janë kryer në harkun kohor dhjetor 2012 deri më korrik 2014. Dokumentet që janë gjetur përbëjnë, sipas hartuesve të raportit, vetëm 5 për qind të akteve të përgjimit, dhe këtu ka nisur edhe debati mes Komisionit Parlamentar Hetimor dhe Drejtuesve të SHISH.

Dule informon Bollanon për aleancën PS-LSI

Një shembull i përgjimit është biseda e Vangjel Dules me Vasil Bollanon. Aty pjesa që është veçuar është ajo ku Dule njofton Bollanon se Rama dhe Meta kanë arritur një marrëveshje për të dalë bashkë në zgjedhje. Kjo bisedë është bërë disa kohë përpara 1 Prillit 2013 kur Meta dhe Rama shpallën aleancën mes tyre.

LISTA/Disa nga emrat e vënë nën përgjim

Edi Rama

Ilir Meta

Sajmir Tahiri

Erion Veliaj

Vangjel Dule

Tom Doshi

Ben Blushi

Taulant Balla

Besnik Bare

Paulin Sterkaj

Armando Prenga

Mark Frroku

Ilir Beqja

Pjerin Ndreu

Lulzim Basha

Sokol Olldashi

Astrit Patozi

Ilir Rusmali

Vasil Bollano

Ylli Rakipi

Frrok Çupi

Blendi Fevziu

Ylli Ndroqi

***

Veçojmë /Mungon një emër te përgjimet?

Pas emisionit “Opinion” mbrëmë në Klan ranë në sy disa elementë që ishte vështirë të të shpëtonin. Përveçse bie në sy mungesa e emrit të ish- kryeministri Sali Berisha mes të përgjuarve, televizioni i njohur pranë Berishës para zgjedhjeve të 2013, kur edhe ndodhi rotacioni politik, e neglizhonte këtë çështje duke mos e përmendur. Por ajo që fshihet në të vërtetë në këto publikime, është se nxirret fakti se këto përgjime janë me firmën e kryeprokurorit Adriatik Llalla, që në të vërtetë është edhe objekti i sulmit nga kjo media. Sulmi ndaj kryeprokurorit ka filluar prej kohësh që me arrestimin e ish-guvernatorit Ardian Fullani, i njohur për lidhje të afërta si me drejtuesit e televizionit.