Ende nuk kanë dalë shkaktarët e ngjarjeve të rënda

I dashur kryeredaktor i gazetës DITA! Me gazetën DITA jam njohur dhe e marr rregullisht, që ditën e parë që ka dalë. Ju falenderoj për punën cilësore e me përgjegjësi që bëni në mbi 20 faqet e saj, dhe me një çmim nën koston e saj, ku jam plotësisht me mendimet e propozimet tuaja. Jemi në një demokraci të brishtë e pothuajse në tranzicion akoma, ku të gjitha problemet i kemi si në një magazinë pa inventare. Kam besim që kjo gazetë do nxjerrë mjaft probleme e analiza që do t’i shërbejnë punës së nisur e që do kuptohet më mirë nga disa se çfarë do të thotë përtej të majtës e përtej të djathtës. Realisht kemi një klan brenda politikës që po aplikon diktaturë në rrugën e demokracisë. Për hir të interesave politike e ekonomike, i është marrë e drejta e të jetuarit mjaft shqiptarëve, ku ndër to dhe atyre të prillit në Shkodër, të deputetëve, bizesmenëve, juristëve, politikanëve e atyre që janë mpleksur me veprime të diktuara nga politika etj. nëpërmjet formave nga më të ndryshmet, ku disa me parullën “një bie, mijra ngrihen” (me një këndvështrim ndryshe), disa me justifikimin “drejtim i pa ditur”, disa vdekje aksidentale, disa vdekje natyrale etj. Këto janë bërë e mund të bëhen për të eleminuar kundërshtimet e për të mbuluar korrupsionin politik e ekonomik deri të përmasave ndërkombëtare.

Ende nuk kanë dalë shkaktarët e ngjarjeve sepse është punuar për të mbuluar gjurmët (vrasjet e prillit në Shkodër, e Azem Hajdarit, e deputetit të PS-së, Gërdeci, vrasjet në bulevard të protestuesve, Trebicka, Tani i topit, Pashko etj.), vdekje për të cilat është punuar natën e i kanë qarë ditën. Politika e djathtë ka lozur dhe me emrin e Nënë Terezës, si në bulevardin “Dëshmorët e Kombit”, që u quajt bulevardi i lavireve, bulevard në të cilin donin t’i shihnin ushtarakët të zvarriteshin aty ku kanë parakaluar kohë më parë, bulevard ku u vranë njerëz etj. Po kështu tek aeroporti ku dalin e hynë kriminelë dhe së fundi me qendrën spitalore, ku etikitohet si qendra spitalore Nënë Sudja, e jo Nënë Tereza etj. Prandaj them që ju keni nisur një punë mjaft të mirë me gazetën DITA. Hamit Gojani.

Letër e nënshkruar

Hamit Gojani