Epigrame

Pa titull…

Lavdia rreth kokës,
Si shami e zezë,
Jeta e të gjallëve,
Nxin si një varrezë…
20.01.1999

Pa titull…

Kur ra mbi botë një errësirë,
Parajsa mbeti shkretëtirë,
Ju hap skëterrës çdo kanat,
Se s’kish njeri pa një mëkat.
20.01.1999

Kjo botë…

Kjo botë bërë copë e çikë,
Si brekët e një vrome,
Kjo botë e vjetër bie erë,
Llagëmi dhe kufome.

Kjo botë e shkretë,
Ka të vërtetë,
Mizerjen dhe shëmtimin,
Dhe fallco, fallco,
Vetëm fallco,
Aromën dhe shkëlqimin.
26.01.1999

Pa titull…

Buzë e gruas,
Që kurorën shkel,
Është e ëmbël mjaltë,
E butë si vaj;
Është e ëmbël,
Po në të vërtetë,
Helm e vrer,
Ka në gji të saj…
1.02.1999

Pa titull…

Rrugë e të pabesit,
Është si terri;
Asnjë dritë,
Nuk mund ta ndriçojë,
Ndaj ai,
S’e shikon dot kurrë,
Atë që nesër,
Shpejt do ta rrëzojë.
1999
Pa titull…

Sa shumë, o njerëz,
Në shekuj u sfilitëm,
Të gjenim një njeri,
Që t’i besonim,
Ndaj Jezu Krishtin,
Që për ne dha jetën,
Dhe të mos ish,
Vetë do ta krijonim…
20.02.1999

Polemika…

Për polemikë, more vëllezër,
Me domosdo duhen dy njerëz,
Ndaj polemikë s’bëj sot me ty,
S’plotësohet dot numri dy.
1.5.1998

Pa dashuri…

Dhe macja, dhe qeni i shkretë,
Kan’ nevojë për pak dashuri,
Pa këtë ndjenjë në jetë,
Si mund të rrosh, o njeri?!…
11.02.1999

Pa titull…

Ikën për Shqipërinë
Ditët e bekuara…
Njerëzit lindin dhe vdesin
Si flutura…
Ikën për Shqipërinë,
Ditët e mira,
Njerëzit lindin njerëz,
Dhe rrisin egërsira.
8.12.1998