- Pa titull
Që nga dita e krijimit,
e gjithë jeta është në gjyq,
se dhe m’i miri njerëzimit,
u gozhdua keq në kryq!
Kur dhe Krishti u gozhdua,
ç’mbeti për ty e për mua?!
- Pusi më i errët!
Është një thënie,
sa Bota e herët:
“Zemra është,
pusi më i errët!”
- Kush del në krye
Ashtu si në breg,
mbeturinat nxjerr lumi,
shpesh herë në krye,
ngjitet llumi!
- Rendi i Ri
Këtu mbretëron anarkia,
për asgjë nuk ka as rend-as rregull,
ndaj shtëpisë sonë të mjeruar,
për çdo ditë i bie nga një tjegull..
Dhe kuptohet-ky është veç fillimi,
i atij që quhet Rend i Ri,
kështu si ka nisur-s’ka pikë diskutimi,
s’do kemi as themele-as çati!
- Pa titull
Flet e flet si nëpër gjumë,
thua: “Jeta qenka dreq,
për ata që bën më shumë,
ata ta fusin më keq!”
- Jeta
Jeta është si një cigare,
andej hi e këtej tym,
cigare që duhet pirë,
gjer në fund-o miku im!
- Të jesh barabar!
Që në jetë me këdo,
të jesh barabar,
plumbit me plumb,
zjarrit me zjarr
Këto janë gdhendur,
kudo si me daltë,
helmit me helm,
mjaltit me mjaltë!
- Ëndrrat
Nëpër ëndrra kam prirje gjeniu,
bëhem Zot edhe Perëndi,
ëndërrimet po mos kish njeriu,
do të qe si jeta pa rini!
- Koka e gjarprit
Gjarpri s’ka qeder kur i pret bishtin,
se i rritet prapë-duhet ta dish,
ji i qetë veç kur i shtyp kokën,
sepse koka nuk i del sërish!
- Në vendin tim
Në vendin tim,
ku sytë njeri-tjetrit i nxjerrin vëllezërit,
ku krimbat rrojnë,
më me dinjitet se njerëzit!
9 Qershor, 2017