Braçe: Berisha është strehuar si mjek në pallatin e ish-Sigurimit

Deputeti i Partisë Socialiste Erion Braçe nëpërmjet një postimi në Facebook i është përgjigjur ish-Kryeministrit Sali Berisha, duke i kërkuar që të lërë Hoxhën, pasi dosjet do të hapen dhe për bashkëpunëtorët, duke thumbuar dhe lënë hamendje për figurën e tij.

“Berisha, lëre Hoxhën, shih se dosjet do hapen, madje edhe për dëshmitarët! I kuptoj të gjithë idiotët që mban ky dhe, madje më shumë ata që lidhin diktaturën me ne, mazhorancën dhe Qeverinë e saj!! Vazhdoni bëjeni se kur nuk ke propozim, alternative, 24 vjet këtë keni bërë!! Por, nuk arrij të kuptoj në botë një sërë analistësh të lartë, gazetarësh ca më poshtë, politikanë gjithëfarësh në opozitë që, hapja e një bunkeri taksuar për elitën politike të regjimit, pra hapjen për t’i treguar çdo shqiptari një prej copëzave të diktaturës, e tregojnë si rehabilitim të Enver Hoxhës!”, shkruan Braçe.

“I pari në radhën e këtyre është Sali Berisha, ai të cilit fotot me fëmijët e regjimit, ministrat e regjimit etj, i shfaqen çdo sekonde në çdo portal publik! Unë e kuptoj Sali Berishën. Do të mbulohet tani që është më afër se kurrë procesi i hapjes së dosjeve të ish-Sigurimit të Feçorit! A mos e lexova gabim që ky u strehua si mjek në pallatin e ish- Sigurimit?”, shkruan Braçe. Pak më herët, ish -kryeministri Sali Berisha nëpërmjet faqes se tij Facebook shkruante në postimin e tij, (ndërsa fliste për mitingun e 22 nëntorit), se kryeministri Rama inauguroi muzeun e diktatorit Hoxha.

“Edi Rama inauguroi më 22 nëntor Muzeun e Enver Hoxhës, atit të tij shpirtëror, Hitlerit shqiptar të Pasluftës!”, shkruan më tej deputeti i PD.