E njohim si Ermali i Big Brotherit të fundit, por djali simpatik tashmë duket se do të jetë i tillë edhe në politikë. Ermal Merdani ka vendosur t’i futet politikës, duke zgjedhur anëtarësimin në partinë e Nard Ndokës. Ermali është emëruar disa ditë më parë në postin e kryetarit të Forumit Rinor të Partisë Demokristiane, bën të ditur “Panorama”.
Ermali thotë se dega në të cilën studion dhe pasioni për politikën janë arsyet që e kanë shtyrë të bëhet pjesë e Partisë Demokristiane, aktualisht pjesë e koalicionit qeverisës.
“Unë studioj për Shkenca Politike dhe realisht politikë bërja më tërheq shumë. Në fakt, jam marrë me politikë, e kam qenë dhe nënkryetar i një forumi civil, që tani është bërë politik. Kam pasur oferta po ashtu për të qenë pjesë e partive politike, gjithmonë në strukturat rinore të këtyre partive”, shprehet Ermali.
Ermal Merdani nuk është personazhi i parë që vjen nga Big Brotheri në partinë e Ndokës. Pak vite më parë, në listat e kësaj partie për Vlorën ishte edhe emri i Qetësor Ferunajt, i cili ishte ndërkohë në shtëpinë e reality shout “Big Brother”. Qetësori e fitoi Big Brotherin atë vit, por u tërhoq gradualisht nga PDK, duke e argumentuar këtë vendim si diçka të pamenduar mirë, por që pavarësisht kësaj nuk kishte gjetur ndonjë mbështetje nga kryetari Ndoka. Të urojmë që Ermalit t’i ecë më mirë.