Nëna e të gjitha ndeshjeve

Shqipëria kundër Serbisë! Harrojeni Kristiano Ronaldon, Frank Riberi apo yjet e tjerë të Portugalisë e Francës, ndonëse kjo e fundit vjen vetëm për miqësore. Janë pikërisht takimet me Serbinë ato që tifozët shqiptarë do të presin me padurim, me shpresën e madhe për një fitore po aq të madhe, sa ajo dikur kundër Greqisë. Është e kotë të thuash që do të jetë vetëm një ndeshje futbolli, që sporti i bashkon njerëzit e që vlen vetëm tri pikë, po aq sa çdo ndeshje tjetër. Futbolli, më tepër se çdo fushë e jetës, është terreni ku ndjenjat nacionaliste gjejnë habitatin e tyre natyral më tepër se kudo dhe kjo nuk ndodh vetëm me Shqipërinë. Madje, janë pikërisht ato ndjenja që bënë Shqipërinë modeste të bënte atë që nuk e bënë shumë të mëdhenj më parë më 4 shtator 2004, duke fituar me Greqinë kampione të Evropës. Sikur të mateshin vetëm vlerat teknike, ndoshta nuk do të kishim fituar kurrë, por në të tilla përballje fusha e gjelbër nuk i përket vetëm futbollit. Është një arenë ku shfaqen furishëm ndjenja të mëdha, ku shekujt parakalojnë me radhë njëri pas tjetrit, me shpinën kërrusur nga luftërat, heroizmat, dhimbjet, gjaku i derdhur e flamujt e djegur. Shumëkush thotë se “Ruzhdi Bizhuta” është tepër i vogël për këtë ndeshje, por nuk ka stadium në botë që të mjaftojë për të mbajtur brenda vetes kaq shumë histori, këtë uragan shpresash për fitore. Ditët do të na duken vite, deri më 8 tetor 2015, kur në Elbasan do të zbresin djemtë kuqezi. Për një fitore, që vlen shumë më tepër se tri pikë.

Euro 2016, Shqipëria në grup me Serbinë

Portugalia do të jetë kundërshtari i parë i kombëtares shqiptare për eliminatoret e kampionatit evropian Euro 2016, pas shortit të hedhur dje në Nisë të Francës. Kuqezinjtë e Xhani De Biazit do të jenë në Grupin I, së bashku me skuadrën e Kristiano Ronaldos, Danimarkën, Serbinë dhe Armeninë, ndërkohë që bashkë me to në këtë grup është edhe Franca, për të luajtur një numër miqësoresh “të detyruara”, rezultati i të cilave nuk do të ketë vlerë për renditjen. Për herë të parë finalet e një evropiani do të kenë 24 skuadra, me dy që kualifikohen direkt dhe e treta më e mirë e të gjithë grupeve, ndërsa tetë të tretat e tjera do të luajnë në play-off, për të nxjerrë katër skuadrat e fundit që i bashkohen Francës organizatore. Në teori, shanset janë të mëdha, me rritjen e numrit të finalistëve, por e vërteta është që kuqezinjtë kanë rënë në një grup shumë të fortë. Favorite absolute është Portugalia, ndërkohë që vendi i dytë do të jetë objekt beteje midis skuadrave të tjera, ku sigurisht Shqipëra nuk shihet e favorizuar para Danimarkës e Serbisë, por edhe Armenisë, një skuadër në rritje të vazhdueshme dhe me lojtarë mjaft të fortë, ku spikat mbi të gjithë Mkhitarian i Borusia Dortmund. Kombëtarja shqiptare e hap më 7 shtator në mbrëmje në Portugali, ndërsa më 11 tetor do të debutojë para tifozëve të saj në Elbasan, kundër Danimarkës. Katër ditë më pas do të jetë ndeshja kundër Serbisë në Beograd, e fundit për këtë vit. Në vitin e ardhshëm, Shqipëria e hap me Armeninë, kundërshtar me të cilin edhe e mbyll fushatën eliminatore, më 11 tetor, në Jerevan. Ndeshja e shumëpritur me Serbinë do të jetë më 8 tetor të vitit të ardhshëm.

Euro 2016, Grupi I

Kalendari i Shqipërisë

Portugali-Shqipëri   7 shtator 2014 (20:45)

Shqipëri–Danimarkë   11 tetor 2014 (20:45)

Serbi–Shqipëri       14 tetor 2014 (20:45)

Shqipëri–Armeni      29 mars 2015 (18:00)

Danimarkë–Shqipëri   4 shtator 2015 (20:45)

Shqipëri-Portugali   7 shtator 2015 (20:45)

Shqipëri–Serbi       8 tetor 2015 (20:45)

Armeni–Shqipëri      11 tetor 2015 (18:00)