Evazioni i frikshëm i Lojërave të Fatit

Disa herë shtypi ka folur për abuzimet që bëhen te lojërat e fatit si dhe për punonjës në Drejtorinë e Mbikëqyrjes së Lojërave të Fatit, të cilët kanë denoncuar shkeljet e ndryshme.

Madje edhe vetë kryetari aktual i Bashkisë së Tiranës ka deklaruar për mbi 300 salla lojërash, të cilat nuk janë të licencuara në kryeqytet. Dhe, megjithëse janë bërë gjithë këto deklarime nga drejtues e zyrtarë të lartë ka vetëm heshtje. Kudo, në Kryeministri, Prokurori e kudo që kjo çështje është bërë me dije. Vërtet që na habit fakti se si të gjitha institucionet e shtetit heshtin për një problem që i kushton arkës së shtetit miliarda lekë në vit. Lekë të cilat nuk arkëtohen kurrë dhe shkojnë në xhepat e ndonjë personi “VIP” në vend që të shkojnë në ndihmë të qytetarit.

Redaksia e gazetës DITA ndoqi në terren këtë çështje të përhapjes së kazinove e lojërave të ndryshme të fatit dhe duket qartë se në çdo cep të Tiranës ka lojëra fati. Në çdo pëllëmbë tokë gjen mjedise të tilla, aq sa janë bërë edhe pjesë e humorit. Hymë në 4 salla lojërash të rastësishme në kryeqytet, në zona të ndryshme, të cilat kanë letra të rregullta (kontrolluam niptin të varur në një kornizë në mur). Dhe për këtë arsye vendosëm që këtë çështje ta bëjmë një objekt analize e diskutimi  me ju z.Kryeministër në largim por edhe me të tjerë: Me ju z.Ministër i Financave; Me ju z.Prokuror i Përgjithshëm; Me ju z.kryetar i Kontrollit të Lartë të Shtetit; Me ju z.kryetar I Bashkisë së Tiranës; Me ju z.kryetar i Drejtorisë së Tatimeve.

Salla e parë

Në rrugën “Sami Frashëri” ndodhet salla “Vegas”, e cila ka brenda në sallë 25 automate, 4 tavolina pokeri dhe një ruletë.

Taksa që kjo kazino paguan në shtet është vetëm për dhjetë makina automate. Pra, në këtë sallë nuk paguhet në shtet për 15 makina, taksa e secilës në shtet është 1 milionë lekë (pra 15 milionë). Nuk paguhet në shtet taksa 1.5 milionë lekë në muaj për 4 tavolina pokeri (pra 6 milionë) si dhe taksa e një rulete, që kushton 34 milionë lekë në muaj. Pra, në total, dëmi i shtetit nga kjo kazino është 55 milionë lekë në muaj.

Salla e dytë

Salla në rrugën “4 Dëshmorët” ka brenda në sallë 30 makina Apeks dhe paguan në shtet, ashtu si salla e parë, taksën vetëm për 10 makina. Pra, në këtë sallë nuk paguhet taksa në shtet 1 milionë lekë për 20 makina dhe në total shifra që i bëhen dëm buxhetit të shtetit është 20 milionë lekë në muaj.

Salla e tretë

Salla te rruga “Bardhyl”, te ish-markata e vjetër, janë 75 makina dhe një rulet. Në këtë sallë janë 65 makina që punojnë në të zezë dhe për secilën taksa është 1 milionë lekë (65 milionë). Ndërsa për ruletin taksa që kjo sallë duhet t’i paguajë shtetit është 10 milionë lekë në muaj si dhe 3 milionë për çdo karrige ruleti (8 ka kjo lojë). Pra, në total kjo sallë lojërash nuk i paguan shtetit 99 milionë lekë në muaj.

Salla e katërt

Salla te rruga “Nikolla Tupe” ka brenda në sallë 45 makina të tipit Mërkur, por vetëm për 10 makina paguhet taksa në shtet, ndërsa për 35 makinat e tjera jo, ndërkohë që secila ka taksën 1 milionë lekë. Pra, në total kjo sallë nuk i paguan shtetit 35 milionë lekë. Pra, për një muaj, në katër sallat që pamë dëmi që i bëhet buxhetit të shtetit është: 55mln+20mln+99mln+35mln=209mln (milionë) lekë! Po në 300 salla që janë në gjithë Tiranën? Po në 12 muaj të vitit? Atëherë shifra që del është marramendëse dhe askush nuk kujtohet të ndërhyjë për të evituar këtë vjedhje masive që i bëhet shtetit

Qytetari që luan…

Qytetarit që luan në një makinë të pacertifikuar është një lojtar që vetëm humbet. Pse? Sepse këto makina elektronike që punojnë në të zezë, janë jashtë kontrollit dhe fiksohen pa mbikqyrje. Probabiliteti për manipulime të tyre është shumë i lartë. Lojtari është i predispozuar që të humbasë. Qeveria, duke  mos i kontrolluar e certifikuar këto makineri elektronike nuk del në krah të lojtarit, siç duhet të ndodhë realisht, por në krah të biznesit, që fiton shuma marramendëse në disa mënyra. Së pari, duke mos e certifikuar makinën elektronike dhe së dyti duke e manipuluar atë në kurriz të lojtarit dhe në favor të xhepit të tij. Mos-certifikimi i makinerisë së lojës elektronike i sjell një humbje prej 1 milionë lekësh për çdo pajisje shtetit shqiptar, ndërkohë që në një sallë janë disa të tilla që punojnë në të zezë.

Analizoni humbjet që ka shteti vetëm me këto 4 salla që ne vëzhguam si gazetarë dhe do të kuptoni dëmin që i bëhet shtetit shqiptar dhe qytetarëve. Ndërsa humbja është shumë herë më e madhe po të mendosh se në gjithë kryeqytetin janë 8 mijë makina elektronike të ndryshme që janë në të zezë dhe që nuk paguajnë asnjë qindarkë. Shifra përfundimtare është e frikshme, një humbje kolosale për buxhetin e varfër të Shqipërisë, që zhytet përditë në borxhe.

Të gjithë ju që përfaqësoni një institucion në këtë ankesë që kemi bërë jeni përgjegjës dhe për këtë ndoshta një ditë do të jepni llogari. Shkresat e ankesat për këto probleme me lojërat e fatit nuk mungojnë prej vitesh në zyrat tuaja. Mjafton të lexoni shkrimin e ish-drejtorit të certifikimit në artikullin e gazetës DITA të disa ditëve më parë dhe do të kuptoni neglizhencën tuaj të qëllimshme, pasi ju i bëni një dëm kolosal shtetit shqiptar. Të vendosur në atë zyrë ju keni për detyrë të paktën të hetoni dhe të bënë detyrën tuaj, që është minimalja, secili për pjesën që i takon: Kryeprokurori të hetojë; tatimet të vjelin taksat e tatimit që duhet të paguhen në shtet; Kontrolli i Lartë i Shtetit të kontrollojë abuzimet e kryera e kështu me radhë. Merreni në shqyrtim këtë ankesë të një redaksie, e cila në pak ditë bëri  një punë dhe verifikoi një shkelje për të cilën ju keni informacion prej kohësh, por vazhdoni të heshtni.