Familja e deputetit të ndjerë Fatmir Xhindi i ka dërguar një letër të hapur presidentit të republikës, Bujar Nishani, kryeministrit Berisha dhe prokurorit të Përgjithshëm, Adriatik Llalla. Katër vjet pas vrasjes së njeriut të tyre të dashur, familja Xhindi kërkon zbardhjen e ngjarjes si dhe mospërdorimin e kësaj çështje për fushate zgjedhore. Familjarët e deputetit Xhindi thonë se pavarësisht se kanë kaluar katër vite, asgjë nuk është bërë për të zbardhur vrasjen, madje ngjarja përdoret në momente të caktuara edhe për qëllime elektorale. Duke iu drejtuar presidentit Nishani, familjarët e deputetit Xhindi i rikujtojnë atij se kur mbante postin e ministrit të Brendshëm, kishte deklaruar se ekzistonin fakte dhe prova për ta mbyllur dosjen dhe për të vënë autorët para drejtësisë. Ata thonë në letër se presidenti e riartikulon çështjen sa herë nevojitet.
Letra vjen pak kohë pasi Prokurori e Përgjithshme bëri të ditur se dosja për vrasjen e deputetit Xhindi, së bashku me disa dosje të tjera që janë ende të pazbardhura, janë duke u analizuar për të gjetur fakte dhe prova të tjera, me qëllim rihapjen e hetimeve.
Deputeti i PS në tre legjislatura u vra në oborrin e shtëpisë së tij në Roskovec të Fierit në maj të vitit 2009.