Rreth tetë muaj më parë humbi gruan për shkak të shirave të dendur, ndërsa këtë tetor, familja Abrashi në Pogradec ka humbur edhe shtëpinë.
Gjysma e banesës është shembur gjatë natës për shkak të motit të keq. Një përrua aty pranë sjell ujëra të shumtë, çka rrezikon seriozisht këtë familje.
Lumi i Vërdovës ka dalë nga shtrati për shkak të përmbytjeve të shumta. Bashkia e qytetit nuk ka marrë ende masa për të evakuuar banorët e kësaj zone.
Për fat, nga shembja e banesës nuk ka pasur persona të lënduar, edhe pse në brendësi të saj ishin 6 persona, tre prej të cilëve fëmijë. “Po të mos isha në banesë, fëmijët mund t’i kishte zënë muri i shembur”, tregon Andrea Abrashi.
Në shkurt të këtij viti, Miranda Abrashi humbi jetën teksa u mor nga rrjedha e lumit. Gruaja u gjet disa orë më vonë në Liqenin e Pogradecit, në grykëderdhjen e lumit. /Dita/