Fatos Klosi: Llalla të thërrasë Berishën për përgjimet

 Ish-kreu i Shërbimit Informativ Shtetëror, Fatos Klosi shprehet se çështja e përgjimeve tashmë është kthyer në një lojë politike për të goditur policinë dhe përmes saj dhe qeverinë e Ramës. Sipas tij, duhet të thërritet nga prokuroria i pari Sali Berisha, njeriu që bëri publike këtë skemë, ndërkohë që ai akuzon për një skenar mirëfilli kundër mazhorancës në lidhje me këtë çështje në të cilën janë përfshirë Prokuroria, SHISH dhe mbi të gjitha presidenti Bujar Nishani.

“Gjithë problemi sipas meje ka një prapavijë të pastër politike, prandaj gjithçka ka ndodhur deri më tani është në këtë kuadër. Që kur filloi me veprimet e kreut të SHISH dhe me mënyrën si po vazhdon, vetëm sjell argumente në favor të kësaj teze. Qëllimi është të diskreditohet Policia, Ministria e Brëndeshme dhe Qeveria për gjoja veprime të paligjshme si dhe për të larguar vëmendjen e opinionit publik nga Reforma në Drejtësi dhe probleme të tjera të mëdha që ka vendi. Të gjithë ata që i kanë fryrë këtij problemi nga Presidenti e poshtë, janë pjesëmarrës në këtë unison të mbrapshtë.Akoma nuk ka dalë e qartë se ku është vepra penale e kryer. Tek Prokurori kërkohet miratim për përgjime konkrete. S’e kam dëgjuar ndonjëherë se u dashka marrë dora e Prokurorit, për aparaturat që duhet të ketë Policia apo institucione të tjerë. Eshte absurde. Aq më tepër, të merret leja për kualifikimin e oficerëve të policisë në fusha të ndryshme”, tha Klosi në një intervistë për “TemA”.

Në lidhje me të ashtuquajturin pajisje përgjimi, Klosi nënvizon faktin se asnjeherë nuk merret leje nga prokuroria për aparatura, por merret leje vetëm për të bërë përgjimin. Ish-kreu i SHISH thotë se Visho Ajazi Lika është pjesë e këtij skenari dhe nuk po bën punën që e ngarkon Kushtetuta. Sipas tij deri më tani ka dërguar se është bërë përdorim i kësaj aparature nga një burg, pavarësisht se nuk e di nëse është e vërtetë, por në përfundim ai thotë se të gjitha këto bëhen për të penguar Reformën në Drejtësi. Ku me sa duket bashkë dhe me kundërshtitë ndaj partnerëve tanë ndërkombëtarë ata që e pengojnë kanë halle të mëdha me drejtësinë për ndonjë krim të pandëshkuar. Për të, ndonëse nuk është e qartë nëse Flamur Noka është rekrutuar nga shërbimi sekret ish-jugosllav, nëse ai ka pranuar bashkëpunimin, problemi nuk është aq i thjeshtë, është cilësisht ndryshe nga të gjitha krimet e tjera. Ndërsa dosjet e UDB nga serbët do të hapen të fundit, ndërkohë që është shumë vështirë të hapen ndonjëherë.