Fëmijët e Gërdecit! Rrëfimet e atyre që humbën të afërmit nga shpërthimi

Tri rrëfime, tre fëmijë dhe ngjarja e Gërdecit u trajtuan në një emision të “Top Story”-t. Përmes personazheve dhe intervistave ekskluzive, për herë të parë u pasqyruan pasojat e mëdha që ka lënë shpërthimi i fabrikës së demontimit të armëve.

Rrëfimi prekës i Reginës. Humbi krahun në tragjedinë e Gërdecit

Një fshat i rindërtuar me vila të larta dhe kujtimi i një tragjedie që ndihet në çdo rrugicë dhe godinë. Fëmijë që iu këput jeta në moshën më të bukur, dhe të tjerë që nuk njohën dot as nënën e tyre.

Jetë të shkatërruara dhe familje që ende jetojnë dramën e shpërthimit, që mori 26 jetë të pafajshme njerëzish dhe plagosi mbi 300 të tjerë. Shkaktarët e tragjedisë iu gëzohen miliardave dhe posteve, familjet jetojnë me dhimbjen e tragjedisë dhe mungesën e drejtësisë.

“Top Story” udhëtoi për në Gërdec, për të sjellë edhe njëherë në vëmendje ngjarjen që ndodhi aty dhe pasojat që kjo ngjarje la mbrapa.

Përmes personazheve dhe intervistave ekskluzive, “Top Story” tregon tmerrin e përjetuar nga vetë banorët gjatë shpërthimit të armëve në Gërdec dhe vazhdimësia e jetesës së tyre pas kësaj ngjarjeje.

Regina, 17 vjeç, është një nga personazhet që “Top Story” intervistoi. Ajo kujton dhe rrëfen për “Top Story” të gjithë shpërthimin që ndodhi në Gërdec dhe sesi një predhë e goditi dhe e la pa ndjenja, moment ky që i ndryshoi të gjithë jetën. Ishte vetëm 6 vjeç në atë kohë.

Pas këtij momenti, Reginës i ka ecur jeta vetëm me gjilpëra në spital dhe me shpresën e rikuperimit për t’iu kthyer jetës normale, dhe pse mes kësaj lufte humbi njërin krah.

“Në fakt aty mu dukte vetja shumë mirë, nuk e dija atë që kishte ndodhur, edhe ilaçet qetësuesit bënë punën e vetë. Por e kam kuptuar pak më vonë kur babi më tha mos u kthe nga ana tjetër se vritesh, dhe kur, më shtyu kureshtja e fëmijës pse të mos kthehem, dhe pastaj kur preka pjesën e krahut se kisha… Se unë nuk e shihja veten, as në pasqyrë as në ndonjë vend tjetër, isha me fasho, më dukej normale deri kur kuptova që se kisha”, rrëfen Regina Murati, ish-banore e Gërdecit.

“Unë e pyeta për gjithë fëmijët e motrës, gjithë familjen me emra, ajo ishte shumë e saktë. E pyeta për çunin e xhajes, ngaqë ai ishte içik esmer, fëmijët i thonin Pëllumb i zi, Pëllumb e ka emrin ai, edhe i tha, ky është Pëllumbi i zi”, rrëfen Kujtim Murati, ish banor i Gërdecit, babai i Reginës.

Regina tregon se ajo nuk është si të tjerët.

Ajo ka vështirësi kur realizon diçka vetëm me një dorë, por pavarësisht kësaj ajo ndihet e zonja të ndihet si të gjithë bashkëmoshataret e saj. Regina bën apel që të mos bëhen padrejtësi ndaj njerëzve të pafajshëm.

“Dhe për mua është e vështirë, sepse nuk është e lehtë të dalësh para të gjithëve dhe të thuash përjetimet e tua. Apel për të gjithë është që mos bëni padrejtësi ndaj njerëzve që janë të pafajshëm, se unë nuk pata bërë asgjë, isha në fillimet e mia…”, apelon Regina, ish-banore e Gërdecit.

Kujtimi, babai i Reginës, e cila mbeti e plagosur nga ngjarja e Gërdecit, mes vështërsive për të përballuar pasojat, kërkon drejtësinë e munguar për kaq vite.

Ai ka hapur një padi ndaj “AlbaDemil” me administrator Mihal Delijorgjin, ka fituar gjyqin dhe kërkon që drejtësia të funksionojë.

“Unë kërkoj drejtësi, ndodhi ajo që ndodhi, ajo nuk kthehet mbrapsht. Unë kam hapur një padi ndaj kompanisë ‘Albademil’, me pronar Mihal Delijorgjin, e kam fituar në Gjykatën e Shkallës së Parë, ka shkuar në Apel, e kam fituar edhe në Apel, është marrë vendimi i formës së prerë. E kam vendimin, shkoj te Zyra Përmbarimore, kur e shohin të gjithë më dalin në atë konkluzionin që do të kryejnë punë shumë shpejt. E mbajnë, ka që e kanë mbajtur 10 ditë, 6 muaj edhe më shumë, edhe asnjëri. Nuk e di çfarë ndodh, a kërcënohen, a ndodh diçka tjetër, nuk e di. Unë thjesht kam një dosje me letra e asnjë veprim tjetër”, thotë Kujtim Murati, ish-banor i Gërdecit.

Rrëfimi i Kristianës. Humbi të ëmën në tragjedinë e Gërdecit dhe sot është e birësuar

Kristiana nuk e njeh mamanë e saj, sepse e humbi kur ndodhi shpërthimi në Gërdec dhe u rrit nga Fatbardha Dani, e afërme e Kristianës.

Kristiana, së bashku me Fatbardhën, ekskluzivisht për “Top Story” rrëfejnë peripecitë, pasojat që shpërthimi në Gërdec la në familjet e tyre, dhe sesi ngjarja e ndodhur i mori jetën mamasë së Kristianës.

“Rastësisht e kanë gjetur vajzën aty edhe e kanë çuar në spital, aty e kemi parë në 7 të darkës që ishte komplet e djegur, por në ato momente ishte e vetëdijshme, fliste, tregonte për ngjarjen, pastaj i ra si vdekje klinike dhe doktorët thanë se do ta çonin jashtë. Në orën 12 u përmend edhe e çuan, shkoi kunata ime aty, shkoi në Itali për t’u kuruar, bëri dy herë operacion transplant, të tretën s’e përballoi dot dhe vdiq. Ajo vdiq më 12 prill, se rrojti një muaj atëherë”, rrëfen ngjarjen Fatbardha Dani, nënë birësuese e Kristianës.

Kristina, e cila ishte vetëm 4 muajshe kur humbi të ëmën, tregon për “Top Story” se nuk e ndien mungesën e prindërve, sepse ato nuk i njohu kurrë.

Gjyshërit e saj i dhanë fund jetës duke pirë helm, sepse nuk e duruan dot dhimbjen e humbjes së jetës së të ëmës së Kristianës. Ajo është një nxënëse shumë e mirë dhe ëndërron të bëhet mësuese.

Ndërkohë që, Fatbardha i bën një kërkesë shtetit që të ketë vëmendje kundrejt Kristianës, sepse vëmendja e tyre ka munguar për kaq vite radhazi.

Historia e Erison Durdajt, djalit 7-vjeçar që humbi jetën nga shpërthimi i Gërdecit

Zamira është nëna që humbi djalin e saj, i quajtur Eri, gjatë shpërthimit të armëve në Gërdec.

Ajo tregon sesi Eri doli për të luajtur me biçikletë me fëmijët e tjerë, e më pas humbi jetën nga plagët dhe djegiet e rënda, që mori nga shpërthimi i armëve në Gërdec.

Edhe pse Erin e nisën për kurim në Itali, pas dy javësh ai nuk mundi t’u rezistojë plagëve të marra. Vogëlushi luftoi deri në fund, por kjo nuk mjaftonte. Për Zamirën, ndjesia e një nëne ishte lajmëtare e ngjarjes së kobshme.

“Fjala e parë që më tha ishte ‘më fal që ika pa leje’… Kjo ka qenë fjala e parë e Erit. Do shërohej e kisha shpresën, por djegia që ajo…e pati në pjesën e qafës e nuk furnizohej më komplet atë… që lidhen më qafën e trurin, nuk funksiononin, edhe rruazat e kuqe e të bardha kur ka bërë analizat në Itali nuk ishin… Ishte helmuar komplet organizmi, komplet, ndaj u shuan rruazat e kuqe e të bardha. E ndieva që në shpirt diçka u këput, Feruazani bëri sikur ishte në gjumë e nuk e dëgjonte telefonin, pas këmbënguljes sime të disa telefonatave, zileve që shkonin në Itali, ky e hap. Tha çfarë ke, thashë si është çuni, mirë tha ne jemi në gjumë. I thashë bëj be, jo tha jo, po shiko dy kalamajtë e tjerë se ai mbaroi. Kapa gocën që flinim bashkë, s’kisha ça të bëja, të ulërisja. Jam shtrënguar aq shumë sa nuk di çtë them”, tha Zamira Durdaj, nëna e Erison Durdaj.

v.l/ Dita