Poni merret në pyetje nga policia, dyshohet për shpërdorim detyre

Merret për më shumë se dy orë në pyetje në Drejtorinë e Policisë së Tiranës, ish-Zëvendësministri i Brendshëm, Ferdinand Poni. Shkak janë bërë dyshimet për abuzime dhe afera korruptive në Ministrinë e Brendshme gjatë katër viteve të fundit. Për momentin, Poni, njëkohësisht kreu i këshilltarëve të djathtë në Këshillin Bashkiak të Tiranës, është nën verifikim si i dyshuar dhe në cilësinë e personit që ka dijeni për disa nga çështjet abuzive të zbuluara në dikaster. Por statusi i tij mund të ndryshojë me kalimin e orëve, nëse Zyra e Krimit Ekonomiko-Financiar dhe Task-Forca e Prokurorisë së Tiranës do e gjejnë të dyshuar në këtë dosje. Gjithashtu mësohet nga burime policore, se këtë herë objekt hetimi është bërë Sektori i Marrëdhënieve me Publikun në ministri dhe në orët në vijim pritet të pyeten dhe shoqërohen zyrtarë të tjerë. Policia nuk specifikoi çështjet konkrete, pasi pritet që dosja të përgatitet e plotë nga grupi hetimor dhe më tej të dilet në konkluzione. Por mësohet se gjithçka ka të bëjë në lidhje me tenderat e zhvilluar dhe inventarin e Ministrisë së Brendshme.

Poni

Burime të besueshme i thanë gazetës DITA se shoqërimi i ish-Zëvendësministrit të Brendshëm ka lidhje me detyrën e tij si funksionar i dikasterit. Vepra penale që po hetohet dhe verifikohet është “shpërdorimi i detyrës”. Po kështu edhe për zyrtarët e tjerë që pritet të shoqërohen dhe merren në pyetje në vijim për këto çështje. Në shënjestër këtë herë është vendosur Sektori i Marrëdhënieve me Publikun dhe aktiviteti i Këshilltarëve të ministrit. Duke qenë në rang piramide i dyti pas ministrit, Poni ka pasur edhe të drejtën e firmosjes për tendera të ndryshëm dhe të gjithë aktivitetin ekonomik të dikasterit. Prej dy muajsh, Zyra e Inspektimit të Brendshëm, e njohur ndryshe edhe si Auditi, po kryen verifikimin në Ministrinë e Brendshme të aktivitetit të 4 viteve të fundit dhe më tej. Çdo drejtori apo sektor po kalon në sitë verifikimi financiar dhe dokumentar. Por grupi hetimor nuk specifikoi rastet për të cilat u pyet Poni. Ish-Zëvendësministri u thirr dje rreth orës 16:00 të pasdites në Drejtorinë e Policisë së Tiranës, ku në prezencë edhe të prokurorit të gatshëm, u pyet në lidhje me firmat që ka hedhur për disa operime financiare të kryera vitet e fundit. Inspektimi i Brendshëm i ka referuar policisë një material për hetim me dyshimet për “shpërdorim detyre” dhe “vjedhje nëpërmjet shpërdorimit të detyrës”. Pas më shumë se dy orësh Poni është lënë i lirë dhe i është bërë me dije se mund të thërritet përsëri. Vetë Poni ka pranuar në mbrëmje se ishte thirrur në polici, “në cilësinë e një personi që ka dijeni për çështjet dhe jo më tepër”, por nuk dha detaje se për çfarë rastesh bëhej fjalë.

Procedura

Burime zyrtare i thanë gazetës se kjo dosje ende nuk është e përfunduar dhe është nën hetim. Do të pritet pyetja e të gjithë zyrtarëve të përfshirë në dy çështjet e zbuluara nga auditi dhe që janë referuar, për të kaluar në hapin tjetër, komunikimin e akuzave përkatëse. Nëse grupi hetimor do arrijë të provojë me dokumente se edhe ish-Zëvendësministri ka abuzuar me detyrën, atëherë ai do të thërritet përsëri në orët e ardhshme për ta vënë në dijeni. Po e njëjta gjë do ndodhë me rangun më të ulët të zyrtarëve të Sektorit të Marrëdhënieve me Publikun apo këshilltarët. Sqarohet se të dyshuar janë drejtuesit e zyrës, që kanë pasur edhe të drejtën e firmës. Por nuk specifikohet nëse gjatë kësaj kohe janë zhdukur materiale apo pajisje të blera me tender, apo janë kryer abuzime financiare në tenderime me vlera dëmi të konsiderueshme. “Inspektimi po bëhet në të gjitha zyrat e Ministrisë së Brendshme. Është vijimësi edhe e denoncimit të disa ditëve më parë për drejtuesit e Parkut të Ministrisë së Brendshme”, thanë burime të policisë. Aktualisht mësohet se inspektimet po kryhen në drejtoritë Ekonomike, Financat, SHKB, Kabineti, Personeli dhe të tjerat.