Sër Aleks Ferguson, trajneri legjendar i Mançester Junaited, u shpreh para supersfidës Real Madrid-Mançester J. se rezultati i vetëm që mund të përjashtohet në këtë takim është një barazim pa gola.
Rezultati i mundshëm – Nuk më pëlqejnë rezultatet 0-0 në transfertat e Champions. Nuk do të ketë një rezultat të tillë në këtë ndeshje, jua garantoj. Do të ketë gola. Me Realin dhe Mançesterin në fushë gjithmonë ka gola. Është mëkat që ndeshemi në këtë fazë dhe jo në finale.
Kristiano Ronaldo – Është i pjekur tashmë, është në kulmin e karrierës. Kur u largua nga Mançesteri ishte në një nivel shumë të mirë, ndërsa tek Reali është përmirësuar edhe më shumë. Ai dhe Messi janë më të mirët në planet. Është e pabesueshme se sa gola shënojnë.
A mund të fitojë Mançester Junaited Ligën e Kampioneve? – Mendoj se po. E di që njerëzit thonë se nuk jemi aq të mirë sa në të kaluarën, por unë mendoj se kemi shumë cilësi në skuadër dhe lojtarë të mëdhenj.
Van Persi – Po arrin nivelin e Kristianos dhe Mesit, është i shkëlqyer. Deri tani ka shënuar 23 gola dhe ky fakt nuk ka nevojë për komente. Ka rritur nivelin e ekipit tonë.