Në 100-vjetorin e themelimit të shtetit të saj, Shqipëria ka marrë urime nga personalitete nga e gjithë bota. Mesazhe urimi i janë drejtuar popullit shqiptar përmes presidentit Nishani nga Sekretarja amerikane e Shtetit, Hillari Klinton, Papa Benedikti XVI, presidentët e Greqisë, Italisë e shumë shteteve të tjera fqinje.
Në mesazhin e saj të urimit, zonja Klinton shprehet: “Që nga themelimi i një republike demokratike, Shqipëria ka bërë përparime të mëdha përpara. Sot, Shqipëria është e gatshme të konsolidojë ato fitore dhe të integrohet në një Evropë që është e tërë, e lirë dhe në paqe. Por kjo kërkon miratimin e reformave të mbetura tani, dhe kryerjen e zgjedhjeve të lira dhe transparente parlamentare pranverën që vjen, forcimin më tej të demokracisë dhe modernizimin e Shqipërisë; për t’iu përgjigjur nevojave të popullit shqiptar”.
Ndërsa Papa Benedikti XVI shkruan në mesazhin e tij: “Po ju shkruaj për të shprehur urimet e mia më të përzemërta, me rastin e Festës së Pavarësisë të Republikës së Shqipërisë. Në këtë rast të rëndësishëm, po dërgoj Shumë të Nderuarin Zef Gashi, Prift i Barit, si Përfaqësues të Selisë së Shenjtë, që sjell urimet e mia personale për ju dhe qytetarët tuaj. Nëpërmjet tij, jam i kënaqur t’ju përcjell sigurimet e lutjeve të mia, që ju dhe qeveria juaj të kërkoni forcimin e paqes, drejtësisë dhe përparimit për vendin. Duke përsëritur, zoti President, urimet e mia, ju dërgoj juve dhe popullit të vendit tuaj, bekimet më të shumta!”.