Qeveria vazhdon të ushtrojë presion mbi CEZ-in për furnizimin me energji elektrike , duke e fajësuar atë hapur për mungesën e dritave në disa zona, situata të cilat sipas METE-s vijnë nga problemet e brendshme të vetë kompanisë.
Zv. ministri i Energjetikës, Eno Bozdo, deklaroi në një prononcim për mediat se “Qeveria ka importuar e vazhdon të importojë energji, që të mos mungojë tek asnjë konsumator, por përgjegjës për këtë situatë është CEZ, e cila problematikën e rëndë të brendshme e ka transmetuar tek konsumatorët. Kujtojmë që METE është duke monitoruar nga shumë afër situatën, ne kemi vënë në dijeni të gjitha organet kompetente për të siguruar që çdo gjë të shkojë normalisht”, shprehet ai.
Bozdo i bëri thirrje të gjithë punonjësve të CEZ Shpërndarje që të zbatojnë ligjin dhe vetëm ligjin, ndërsa kompania duhet të marrë masat për dimrin. “Furnizimi me energji është kompetencë e saj, prandaj duhet të veprojë me urgjencë për forcimin e bazës materiale, mungesa e transformatorëve, kabllove rezervë nuk duhet të ndikojë në mungesën e energjisë për konsumatorët familjarë apo për bizneset”, tha ai