Fier, arrestohet 58-vjeçari, dyshohet se ka abuzuar me të bijën

Një akt incesti është denoncuar në polici nga një e mitur 16-vjeçare. Një vajzë nga Levani i Fierit akuzon të atin se e ka përdhunuar në moshën 13-vjeçare. Babai 58-vjeçar, A.G., është vënë në pranga me akuzën e abuzimit seksual me vajzën e tij. Policia e Fierit pohon se vajza kishte rreth 3 muaj që ishte larguar nga banesa dhe kishte shkuar tek disa të afërm të saj në Tropojë. Policia ka nisur hetimet për zbardhjen e plotë të këtij rasti.

16-vjeçarja e ka bërë denoncimin në komisariatin e Tropojës, ku aktualisht gjendet, ndërsa familja e vajzës e mohon mundësinë e një abuzimi seksual nga i ati.

Njoftimi i policisë

“Me datë 30.03.2013 nga forcat e Komisariatit te Policisë Fier, në bashkëpunim me Komisariatin e Policisë Tropojë pas veprimeve të para hetimore dhe vlerësimit të rastit u bë ndalimi i shtetasit me inicialet A. G, vjeç 58, banues në rrethin Fier.
Ndalimi i tij u bë për veprat penale të “Marrëdhënie seksuale ose homoseksuale me dhunë me të mitur” dhe “Marrëdhënie seksuale ose homoseksuale në gjini ose nën kujdestari” parashikuar nga nenet 101 dhe 106 te Kodit Penal, pasi dyshohet se ka abuzuar me vajzën e tij të mitur 16-vjeçare që kur ajo ishte rreth moshës 13 vjeç.
Kallëzimi për rastin është bërë nga 16-vjeçarja, në Komisariatin e Policisë Tropojë, pasi vajza kishte rreth tre muaj që ishte larguar nga banesa e babait dhe kishte shkuar tek te afërmit e saj në rrethin e Tropojës. Materialet procedurale do t’i kalojnë Prokurorisë se Rrethit Gjyqësor Fier për veprime të mëtejshme”.