Vendimi nëse Kosova do të mund të luajë ndeshje miqësore ndërkombëtare do të merret më 10 janar. Konfirmimi erdhi nga presidenti i FIFA-s Sepp Blatter, pas mbledhjes së Komitetit Ekzekutiv në Salvador de Bahia të Brazilit, ku dje u hodh shorti i finaleve të botërorit. Ky vendim ishte paralajmëruar disa ditë më parë, madje edhe drejtuesit e Federatës së Futbollit të Kosovës janë të përgatitur madje të bindur së në fillim të 2014 Kosova do të fitojë të drejtën për të luajtur takime miqësore ndërkombëtare. Në faqen zyrtare të FIFA-s bëhet e ditur se Komiteti Ekzekutiv është informuar edhe për takimin ndërmjet Krerëve të Federatës së Futbollit të Kosovës dhe atyre të Serbisë, i zhvilluar më 10 tetor në Zyrih. Mendohet se para se të jepet vendimi do të ketë një tjetër takim me palëve, që të arrihet një konsensus fillestar, ndoshta që Kosova t’i zhvillojë takimet miqësore pa simbolet e saj, ndonëse qëndrimi i palës serbe deri tani ka qenë i prerë kundër. Gjithsesi FIFA do të kërkojë të shfrytëzojë autoritetin e saj për të gjetur një pikë takimi, edhe pse për momentin të dyja federatat, kosovare dhe serbe, qëndrojnë fort në llogore.