Fillon shpërndarja e parave të ish të përndjekurve

50 ish të përndjekurit e parë kanë marrë sot këstin e parë të dëmshpërblimit nga Ministri i Mirëqenies Sociale dhe Rinisë, Erion Veliaj. Në një ceremoni në ministri, Veliaj shpërndau vetë këstin e parë për ish të përndjekurit, duke mbajtur premtimin e bërë rreth tre javë më parë në inaugurimin e Institutit të Integrimit të ish të Përndjekurve Politikë. “Kam qenë institues që ne të jemi ministri e punëve dhe jo e llafeve. Bashkë me Kryeministrin premtuam që brenda muajit ne do ta zhbllokonim këtë situatë dhe ja ku jemi sot. Unë kërkoj ndjesë publikisht sepse jemi përfaqësues të shtetit shqiptar dhe pavarësisht se kush është në pushtet, shteti duhet të dijë të kërkojë ndjesë për detyrat që nuk i ka kryer. Sot do të doja të shpërndaja 54 urdhër-pagesat e para nga 560 dosjet që tashmë i kemi përgatitur dhe trasferuar paratë”, u shpreh Veliaj.

Ai u shpreh se është siguruar personalisht që paratë janë transferuar në llogaritë bankare. “Ju e dini fare mirë që partitë në pushtet e kanë përdorur politikisht këtë kauzë dhe gjithmonë kanë gjykuar se shteti është sot për sot. Ndërsa, unë besoj se shteti është për sot, por është edhe për nesër”, tha ai. “I kam kërkuar ministrisë që fondin ta disbursojë të gjithë, 100%, brenda vitit. Ajo që më rezultoi gjatë 8 viteve të shkuara është se fondi që jepej as nuk shpenzohej për shkak të burokracive.  Kështu, kam kërkuar që pavarsisht rrethanave, fondi të shpenzohet 100%, në mënyrë që vitin tjetër të shpenzojmë më shumë e të jemi më efiçentë”, përfundoi Veliaj.