Fitorja e hidhur e Ina Ramës

Nga Zenepe Luka

Para pak ditësh, ish Kryeprokurorja e Republikës, Ina Rama, pas një lufte të paprinciptë prej tre vjetësh, më në fund fitoi të drejtën e mohuar, duke u rikthyer në detyrën e mëparshme, gjyqtare në Gjykatën e Apelit. Paradoksi ishte, se ish-Kryeprokurorja e Republikës, e vetmja femër në këtë post të lartë në Shqipërinë e më shumë se një shekull shtet, duelin e kishte me Këshillin e Lartë të Drejtësisë, kupolën e drejtësisë të vendit. E cila përveç shkeljes së ligjit e të drejtës, kreu edhe poshtërim ndaj gruas juriste në postin më të lartë të organit të akuzës.

Vendimi

Vetëm pak ditë më parë, pas më shumë se tre vjet, Gjykata e Lartë, me vendimin e saj riktheu në Gjykatën e Apelit Ina Ramën, duke fituar kështu edhe gjyqin me KLD. Kësisoj, pas një sfilitjeje të tejzgjatur asaj i hapet rruga për t’u rikthyer gjyqtare në shkallës së dytë të gjyqësorit. Në këtë vendim, kjo gjykatë në fakt thjesht ka zbatuar ligjin, duke rrëzuar rekursin e bërë nga KLD, kundër vendimit të gjykatës së Apelit, për rikthimin e Ina Ramës si gjyqtare. Në vendimin e saj, Gjykata Administrative e Apelit, vendosi të pranonte padinë e Ina Ramës kundër KLD, duke respektuar të drejtën e saj të ligjshme, që pas përfundimit të mandatit si Kryeprokurore, të rikthehej në detyrën që kishte.

Çështja është shqyrtuar nga një kolegj administrativ ku është vendosur, që rekursi i KLD, të rrëzohet që në dhomën e këshillimit, duke i dhënë këtij vendimi formë të prerë dhe të detyrueshëm për t’u vendosur në zbatim nga KLD. Duke u njohur me vendimin, citojmë: Apeli Administrativ ka vendosur “detyrimin e KLD, t’i propozojë Presidentit të Republikës emërimin e paditëses Ina Rama, në detyrën e Gjykatës së Apelit Tiranë”.

Gjykata e Apelit, kish ndryshuar vendimin e  Administratives së Shkallës së Parë, që kish rrëzuar pretendimin e Ina Ramës, duke mbështetur vendimin e KLD të datës 24 shkurt, që nuk i jepte të drejtën të rikthehej në gjykatën e Apelit dhe nëse duhej të kthehej, ajo duhej t’i nënshtrohej konkurrimit. Ina Rama ngulte këmbë se nuk mund të kthehej tek Apeli i Krimeve të Rënda, ku i sugjerohej, pasi në atë periudhë kjo gjykatë po shqyrtonte çështje penale, që ishin iniciuar në kohën kur ajo ishte kryeprokurore.

Telefonata me Ina Ramën

Fitorja e kryeprokurores ndaj KLD, nëse mund të quhet e tillë një e drejtë legjitime, ishte një lajm, çka tregonte së pari këmbënguljen e saj për të fituar të drejtën, por edhe shpresën tek qytetarët, se zbatimi i ligjit triumfon edhe përballë kokave të përçartura të atyre që drejtojnë kupolën e ‘ligjshmërisë’ në këtë vend. Me emocionet e një mikeje, por më tepër si gazetare, i bëra telefonatë Ina Ramës.

-Faleminderit- u përgjigj ajo, – më në fund u bë drejtësi.

Drejtësia, të ka një borxh edhe më të madh, Ina Rama.

Teksa hedhim këto rreshta, shqiptarët, ndërkombëtarët e kushdo, kur përmendet emri i ish-Kryeprokurores, menjëherë u shkon mendja tek fyerja e rëndë, e cilësuar edhe si vepër penale, që i bëri publikisht ish Kryeministri Berisha pas ngjarjeve të 21 janarit, duke e etiketuar “Lavire Bulevardi”. Bëhej fjalë për “Silvia Kontin”, që u bë Kryeprokurore dhe krejt papritur, pse kjo grua juriste duhej të bënte detyrën, të zbatonte ligjin pas kësaj ngjarjeje të rëndë, fyhet kaq rëndë në personalitetin e saj, aq më tepër nga një Kryeministër…

Shumëkush e cilësoi si lajthitje të kreut të ekzekutivit, por të tjerë, veçanërisht gruaja intelektuale, shtrëngoi nofullat dhe iu drejtua Ina Ramës: “Padite për fyerje publike, për shpifje, penalisht dhe civilisht, kërkoji dëmshpërblim, për të mbrojtur personalitetin tënd”…

Por mesa duket, duke parë rrethanat, heshtjen e ndërkombëtarëve, lënien vetëm në këtë situatë të rëndë edhe shpirtërore, ajo gjykoi se ishte një betejë e humbur dhe më mirë ta kalonte në heshtje…

Pse heshtën të tjerët?

Asnjë reagim nga zonjat e parlamentit, ndaj kësaj fyerjeje të rëndë që iu bë Kryeprokurores së Republikës, jo nga një qytetar i thjeshtë, por nga Kryeministri i vendit.

Mirë parlamentaret e ish maxhorancës, që, fatkeqësisht, në atë kohë kishin një grua në krye të Parlamentit, bashkoheshin për një arsye apo tjetër me Kryeministrin, po mjaft deputete të opozitës, përse heshtën, përse nuk u shfaqën në publik të mbronin të drejtat e saj, që u dhunua verbalist e psikologjikisht, pse kërkonte të zbatonte ligjin…

A mund të rivendoset në afat për të gjykuar këtë fyerje, shpifje, kjo është në dorën e ish Kryeprokurores dhe ligjit në fuqi, por ajo që duhet nënvizuar është, se nëse një ditë do të bëhet dhe ekzekutohet reforma në drejtësi, kjo është një tjetër betejë, që organet e drejtësisë, ia kanë borxh Ina Ramës.

Pasi lë detyrën…

Nuk është e vetmja ish Kryeprokurorja, që u ndëshkua nga KLD. Dy zonja në fushën e jurisprudencës, ish nënkryetare e KQZ, Dëshira Subashi dhe ish kryetare e Gjykatës së Lartë, Shpresa Beçaj, kanë të njëjtin fat. Ato vazhdojnë betejën me KLD, për të fituar të drejtën e tyre, që u garantohet me ligj: Kthimi në vendimin e mëparshëm të punës pas përfundimit të mandatit në funksionin e caktuar.

Por përtej emrave, çfarë ndodh kështu, përse ky qëndrim arbitrar ndaj figurave të rëndësishme që kanë zbatuar me korrektësi ligjin dhe tashmë janë flakur në rrugë, pa punë?

As edhe në një vend të botës së tretë, nuk do të ndesheshe me këtë raste, ku ekspertë, aq më tepër gra, që kanë ushtruar detyra kaq të rëndësishme në organet e drejtësisë, të mos u jepet e drejta që u garanton ligji, nga Këshilli që duhet të garantojë ligjin? Nuk kemi dëgjuar në asnjë rast, që në komisionet e grupeve parlamentare, në  foltoren e Parlamentit të ngrihet ky problem, por, flitet e çfarë nuk flitet, vazhdojnë të fyejnë, shpifin, duke përdorur gjuhën e rrugës.

Atëherë, arrijmë në përfundimin se nuk është puna vetëm tek emrat konkretë, por tek mos sundimi i ligjit, duke flakur në rrugë e shkelur pamëshirë Kushtetutën e ligjet ndërkombëtare të ratifikuara. Me këtë logjikë, a duhet të pranojë poste të tilla kyçe dhe mjaft impenjative dikush tjetër nesër, kur e ka të qartë se në fund të mandatit do përfundojë në rrugë? Edhe ky është një nga fijet e lëmshit të reformës në drejtësi. Kur do të shtëllizet?!