Një ditë pas tragjedisë së ndodhur në liqenin e Shkodrës ku humbën jetën dy kushërinjtë minorenë (djem xhaxhallarësh), familja Tahiri në fshatin Boriç i Madh në Malësinë e Madhe ka hapur dyert e mortit.
Mësohet se Ervis dhe Sabian Tahiri, përkatësisht 13 dhe 15 vjeç, së bashku me dy kushërinj të tjerë dhe 3 shokë (7 persona), shkuan për t’u larë në liqen, por argëtimi i tyre u kthye në tragjedi. Rifat dhe Naim Tahiri, dy baballarët e djemve të mbytur, lajmin e kobshëm e kanë marrë vesh përmes një telefonate nga disa të panjohur.
Elsaidi, vëllai i viktimës Ervis Tahiri, ishte në varkën që e mori rrjedha e liqenit. Ai rrëfeu dje për “Gazeta Shqiptare” momentet e tmerrit. Vëllai i viktimës tregoi me detaje se si ai dhe 4 të tjerët arritën të dilnin të gjallë në breg.