Florenc Hoxha plagoset me thikë nga ish-truproja pas sherrit në lokal

Plagoset me thikë nga ish-truproja i tij në një konflikt të dyshuar pronësie dhe çështjesh personale, kreu i Inspektoriatit Urbanistik Vendor të Tiranës, Florenc Hoxha.

Ngjarja ka ndodhur mbrëmjen e djeshme, rreth orës 22:00 në Farkë të kryeqytetit.

Autori i dyshuar i krimit dyshohet se është Endrit Deliaj, rreth 30-vjeç, një i njohuri i zyrtarit të Bashkisë së Tiranës, ish-vartës i tij dhe sherri ka qenë i çastit, me motiv përplasjet më të hershme që kishin me njëri-tjetrin dhe mosmarrëveshjet.

Burime të rezervuara i thanë gazetës se autori i ngjarjes është një person që dikur ka qenë vartësi i Hoxhës, i cili është shpallur në kërkim dhe po ndiqet për t’u arrestuar.

Kurse zyrtarisht u konfirmua se ngjarja ka ndodhur në ambientet e një lokali në Farkë, ku Hoxha ka qenë i ulur së bashku me dy personat që është konfliktuar, ku emri i dytë nuk u bë i ditur.

Sipas dëshmitarëve, ata kanë pasur njohje me njëri-tjetrin. Por befasisht kanë nisur të flasin me tone të larta dhe më pas fyerje.

Derisa kanë kaluar në përleshje fizike dhe këtu ka ndodhur sulmi agresiv me armë të ftohtë. Indrit Deliaj ka nxjerrë një thikë duke e goditur 2 herë në ije kreun e INUV, i cili ka rënë përtokë i plagosur rëndë.

Autori më pas është larguar me autoveturën e tij me shpejtësi. Policia e Tiranës dhe Komisariati nr. 4 janë njoftuar për ngjarjen dhe u vunë në kërkim të agresorit, për të cilin morën targat e mjetit dhe markën e tij, duke bërë identifikimin dhe shpalljen në kërkim.

Kurse Hoxha u dërgua drejt Qendrës Spitalore “Nënë Tereza” për mjekim dhe pas ndërhyrjes mësohet se ndodhet jashtë rrezikut për jetën.

Një grup hetimor po mbledh dëshmitë dhe po verifikon motivet e krimit, për të zbardhur konfliktet që Hoxha ka pasur me ish-shoqëruesin e tij, madje pritet dhe marrja e tij në pyetje ditën e sotme.