Fondi Monetar Ndërkombëtar ka ulur parashikimet për rritjen globale ekonomike të vitit 2015 dhe vitit të ardhshëm. FMN pret që rritja të jetë 3.5% këtë vit krahasuar me shifrën fillestare të 3.8% që u parashikua në tetor. Edhe parashikimi për vitin 2016 është ulur dhe llogaritet të jetë deri në 3.7%.
Ulja e parashikimit për rritjen ekonomike vjen pavarësisht një rritje të papritur të ekonomisë globale që u reflektua pas uljes së çmimit të naftës që rezultoi pozitive për shumë shtete. FMN pret që shumë faktorë negativë do të ndikojnë në uljen e ekonomisë, dhe kryesisht të investimeve. Ndërkohë për eurozonën FMN pret rikuperimin e mëtejshëm por rritja nuk do të jetë e ndjeshme. Parashikim për eurozonë është 1.2% këtë vit dhe 1.4% në 2016. Për Bankën Qendrore Europiane prioriteti imediat është deflacioni apo rënia e çmimeve.
Ekspertët financiarë thonë se deflacioni është një forcë shqetësuese por nuk është “puthja e vdekjes” sipas tyre dhe nuk pengon rritjen ekonomike. Por deflacioni mund të rilindë krizën e borxhit. Ndërkohë edhe Kina ka pësuar ulje të parashikimit.
Shifrat tregojnë se rritja e ekonomisë u ul në 7.4% vitin e shkuar nga 7.7% në 2013. Sipas FMN në 2016 rritja do të jetë 6.3%, dhe kjo do të ndikojë pozitivisht në rritjen e ekonomive të tjera aziatike. Rënien më të madhe në parashikimin e FMN e ka pësuar Rusia, kjo për shkak të rënies së çmimit të naftës dhe tensionit me Ukrainë i cili rezultoi në sanksione për shtetin rus. Këtë vit rritja atje pritet të jetë 3 % dhe 1% vitin e ardhshëm.
Ndërkohë në SHBA rritja do të jetë 3.6% në 2015 dhe 3.3% në 2016. Rënia e çmimit të naftës ka prekur edhe eksportuesin kryesor Nigerinë, ku rritja ekonomike parashikohet në 4.8%, shifër kjo gjithsesi e lartë për ekonominë nigeriane.