“Do restaurohet shtëpia e Xhafer Devës”, reagon ambasadori gjerman: “Nazist famëkeq, kjo është kultura e kujtesës në mënyrën e gabuar”

Nga Sadri Ramabaja

Botuar në DITA

Prishtinë, 7 shkurt – Brenda një harku kohor prej jo më shumë se një jave, opinioni shqiptar u bombardua me një varg lajmesh e ngjarjesh që, thënë më së buti, nuk na nderojnë fare.

Në kulm të këtij procesi që pretendon ta përmbysë historinë, ishte pa dyshim lajmi për fillimin e punimeve për restaurimin e shtëpisë së kryekuislingut tonë gjatë Luftës së Dytë Botërore – Xhafer Deva!

Duke kaluar mbi 4 shkurtin, datën e masakrës që ai dhe kryeministri kuisling Rexhep Mitrovica, kishin ushtruar në Tiranë (1944), neofashistët tanë, të mbuluar me veladonin e “demokratëve”, po defilonin pra shtatores së Mbretëreshës Geraldinë në Tiranë, ndërkaq në Mitrovicë po fillonin restaurimin e shtëpisë së kolaboratorit fashist Xhafer Deva.

Restaurimi i shtëpisë së Xhafer Devës, siç bëjnë të ditur mediat sot, paska filluar në kuadër të programit “Trashëgimia kulturore si nxitëse për dialogun ndërkomunitar dhe kohezionin social”. Projekti qenka i hartuar nga “CHwB Kosova” ndërkaq po u financoka nga Zyra e Instrumentit për Stabilitet dhe Paqe e Bashkimit Evropian dhe nga Ministria e Kulturës, Rinisë dhe Sportit. E implementimin po e bëka UNDP-ja.

Ka vite që këtë fenomen që ndërlidhet me rehabilitimin e figurave tona kuislinge, e kisha vënë re dhe pata reaguar edhe publikisht, brenda në një nga mbledhjet e Asamblesë së Prishtinës, po edhe në mediat tona.

Në Asamblenë e Komunës së Prishtinës tek ishte krijuar një komision për emërtimin e Shesheve dhe rrugëve, krahas emrave të Asim Vokshit a Veli Dedit, këta antifashistë tanë me të cilët mund të krenohemi gjithandej në Europë, emrat e të cilëve mbajnë sheshet e rrugët në Spanjë e Francë… ishin edhe emrat Xhafer Deva, Rexhep Mitrovica… mungonte vetëm edhe emri i Sinan Hasanit!
Ishte i kotë reagimi im!

Ai komision pat larguar emrin e Veli Dedit për njërën nga rrugicat fare në qendër të Prishtinës tok me atë të Zenel Hajdinit! Reagimi im nuk pat efekt!

Më gëzon fakti që kësaj radhe paska reaguar ambasadori i Gjermanisë në Kosovë, Jorn Rohde (foto kryesore lart), duke dëshmuar se ai, pra Xhafer Deva, kishte qenë bashkëpunëtor i nazistëve që e kryen Holokaustin, gjenocidin ndaj hebrenjve gjatë Luftës së Dytë Botërore.

“Kjo është kultura e kujtesës në mënyrën e gabuar!”, ka shkruar ambasadori gjerman në Twitter.

“Shumë i shqetësuar për planet e restaurimit të shtëpisë së Xhafer Devës, një bashkëpunëtor/protagonist i njohur nazist i SS famëkeq Skënderbeg Div. S’ka zbardhje të historisë! Mos e shtrembëroni të vërtetën në lidhje me Holokaustin ose krimet e luftës të kryera nga nazistët dhe bashkëpunëtorët vendas #MbroFaktet”, ka shkruar Rohde.

Ju falemnderit, ambasador!

Më bën përshtypje se si në këtë ofenzivën për t’i rehabilituar kolaboratorët fashistë, prijnë kolaboratorët e epokës së titizmit, të konvertuar në vitet ’90-ta, në demokratë.

Kjo lagje kolaboratorësh jugosllav, ka vite që pretendon ta hesht këtë periudhë të jetës së tyre, duke veshur veladonin e demokratëve, madje, duke na u prezentuar së fundmi edhe si ndërtues të Shtetit të Kosovës!
Në Europën e demokracive liberale nuk hyjmë dot as si falsifikatorë të historisë e as me mendësinë e kolaboratorëve fashistë!