Spitali i Korçës si fusha e Ballshit!

Kur përmendet Korça, rallë mund të ndodh që mendja dhe ndjesitë e çdo shqiptari, të mos endet në të veçantat e këndshme të këtij qyteti: mësonjëtorja, liceu francez, serenatat, rrugicat e paqta, vilat e bukura, zonjat e zotërinjtë e nurshëm, kërnackat, humori brilant, këngët, poezitë e qejfet e shumta, si të ish një ishull i veçuar të mirash e njerëzish të fisëm, mes një hapësirë ta vrazhdë jete, pa sens e lezet bashkë.

Eshtë pra prej atyre qyteteve rrethuar me një brerore të veçantë, ku e ke shumë të vështirë të gëlltitësh faktin se dhe aty, mizerja shqiptare ka boll mostra, nga më të ndryshmet, e se dhe aty, ndodhin po ato beterpunësh me beternjerëz si kudo në atdheun tonë. Një panoramë e kundërt e gjithë asaj që u përshkruar më sipër për Korçën, është spitali i këtij qytetit. Nuk ka periudhë a muaj që nga spitali i Korçës të mos ketë ndonjë lajm me vdekja a dhunë, ku viktimat janë sa nga rradhët e pacientëve e sa nga bluzat e bardha, të cilat akuzohen ose për paaftësi ose për papërgjëgjshmëri.

Më i freskëti lajm, është ai mbi një person që në një gjendje nervoze kishte shqyer derën e urgjencës së këtij spitali, me pretendimin se djalit nuk i ishte dhënë mjekimi i duhur. Përpos faktit se dhuna po precipiton frikshëm dhe në ambjente spitalore ashtu si në futboll, teksa mjekët shahen e rrihen porsi të ishin arbitra, spitali i Korçës mban rekorde për preçedentë e skandale me mjekë e pacientë, që ende është e vështirë të thuhet se përse e ka zënë ky lloj mallkimi. Vite më parë, puna shkoi deri në zhvarrimin e një të vdekuri, për të rihetuar sesa gisht kishin bluzat e bardha në ikjen nga kjo botë të të ndjerit. Shkurt, spitali i Korçës është bërë si fusha e Ballshit!

P.S. Në këtë rast, fusha e Ballshit është marrë si simbol i skandaleve me rrahje e dhunë, por jo se është e vetmja. U përzgjodh mes të tjerave vetëm nga fakti se aktualisht aty nuk luhet më asnjë ndeshje për shkak të dënimit që ka marrë klubi, pikërisht nga dhuna e atyshme. / E.H.