Formula e llogaritjes së pensioneve të parakohshme për ish-ushtarakët

Paga mesatare referuese mujore neto, si dhe vitet e shërbimit janë dy treguesit bazë mbi të cilët përllogariten përfitimet e parakohshëm për ish-ushtarakët. Autoritetet e sigurimeve shoqërore sqarojnë se në varësi të viteve të shërbimit, personat që janë liruar apo janë në rezervë mund të përllogarisin pensionin e parakohshëm që ju takon. Konkretisht për të përcaktuar llogaritjen e një pensioni të parakohshëm për vjetërsi shërbimi kryhet ky veprim: “Paga mesatare referuese mujore neto e shumëzuar për vitet e shërbimit, dhe për treguesin 1.5 për qind. Rezultati që del përcakton se sa do të jetë pensioni që i takon aplikuesit. Por, mbi këtë rezultat zbatohen edhe disa kushte sa i takon përfitimeve minimale dhe atyre maksimale. Ekspertët e ISSH-së, sqarojnë se: “Në çdo rast, masa e pensionit të parakohshëm nuk mund të jetë më e ulët se pensioni bazë, i cili përcaktohet nga Këshilli i Ministrave, në përputhje me ligjin nr. 7703, datë 11.5.1993 “Për sigurimet shoqërore në Republikën e Shqipërisë”, të ndryshuar”. Çka do të thotë se nëse llogaritjet e bëra dalin më të ulëta se sa pensioni bazë, atëherë aplikuesi do të marrë përfitimin, vlera e të cilit nuk do të jetë më e ulët se sa përfitimi bazë i përcaktuar. Ndërkohë që për të llogaritur pensionin suplementar të pleqërisë përdoret sërish paga mesatare referuese mujore neto dhe vitet e shërbimit. Por, ajo që ndryshon është treguesi në përqindje, i cili ndryshe nga pensioni i parakohshme (ku ishte 1.5 %), tek pensionet suplementare zbret në vlerën e 1 për qind. Kështu llogaritja e pensionit suplementar të pleqërisë gjendet duke shumëzuar pagën mesatare referuese mujore neto me vitet e shërbimit dhe treguesin 1 për qind. Masa që rezulton nga kjo formulë nuk duhet të jetë më shumë se 50 për qind e pensionit të pleqërisë. Për rastet, në të cilat aplikuesit për pension të parakohshëm apo pension suplementar pleqërie mbeten të pakënaqur me shumën e përllogaritur nga ekspertët e sigurimeve shoqërore, ata kanë të drejtën e ankimimit. Për këtë duhet të përgatisin ankesën përkatëse, të cilën duhet ta depozitojnë jo pranë Agjencive Rajonale ku kanë vendbanimin ose qendrën e tërheqjes së pagesës mujore, por pranë Drejtorisë Qendrore të Institutit të Sigurimeve Shoqërore. Nëse edhe pas verifikimit të kësaj kërkese masa e pensionit mbetet po në të njëjtat nivele, atëherë ish-ushtarakut nuk i mbetet gjë tjetër veçse t’u drejtohet organeve gjyqësore për të kërkuar një zgjidhje rreth pakënaqësive të lindura mbi masën e pensionit të parakohshëm që i është caktuar nga llogaritjet e bëra. aktualisht janë me qindra dosjet e depozituara nga personat që janë në rezervë apo janë liruar sa i takon llogaritjeve të përfitimeve të parakohshme. Në vijim të shkrimit gjeni të detajuar një shembull konkret lidhur me formulën që përdoret për llogaritjen e pensioneve të parakohëshme të ish-ushtarakëve.

Shembull konkret i përllogaritjes :

Ushtarakut në rezervë/lirim A.B i lind e drejta për të përfituar pensionin e parakohshëm për vjetërsi shërbimi më datë 8 Maj 2013. Ai ka 17 vite në shërbim dhe paga mesatare referuese mujore neto është 36 937 lekë në muaj.

Llogaritja e pensionit të parakohshëm për vjetërsi shërbimi bëhet në këtë mënyrë:

PPVSH = 36 937 lekë x 17 x 1.5% = 9 419 lekë / muaj

Por, në çdo rast, masa e pensionit të parakohshëm nuk mund të jetë më e ulët se pensioni bazë, i cili përcaktohet nga Këshilli i Ministrave, në përputhje me Ligjin nr. 7703, datë 11.5.1993 “Për sigurimet shoqërore në Republikën e Shqipërisë”, të ndryshuar”.

Në rastin konkret masa e pensionit bazë më datë 8 maj 2013 ishte 11 562 lekë në muaj, pra masa e llogaritur është nën kufirin bazë, e si rrjedhojë masa e PPVSH do të jetë 11 562 lekë në muaj.

Pra, ish-ushtaraku A.B në datën 8 Maj 2013 do të përfitojë pension të parakohshëm për vjetërsi shërbimi në masën 11 562 lekë / muaj.