FOTO: “Duhet të kërkosh mes mallrave turke për të gjetur diçka vendase”, trishtimi i pazarit të Gjirokastrës

Nga Auron Tare

Sot është Dita e Verës. Me shpresë se vizitorët do të mbushin Gjirokastrën të gjithë tregëtaret/artizanet e Qafës së Pazarit i kanë nxjerrë prodhimet e tyre jashtë. Ajo që të bie në sy është mbizotërimi i këtij tregu nga malli më i lirë i mundshëm i ardhur nga Turqia apo Kina. Duhet të kërkosh pak mes mallrave turke për të gjetur diçka vendase. Tek tuk sheh ndonjë usta të vjetër që rreket të bëjë diçka por mallrat e lira nuk i lënë të marrin frymë.

Megjithë restaurimin dy herë të këtij Pazari, një herë në kohë të Berishës/Pango dhe tani të ADF dhe Min Kulture Kumbaro, fatkeqësisht me gjithë milionat e harxhuara askush nuk e kupton thjeshtësinë esenciale se tregu i artizanatit është dhe duhet të jetë shpirti artistik i kombit. Fasada e bukur nuk rrezaton gjë nëse rruga është e mbushur me mallra kine dhe turke. Fatkeqësisht turizmi sëbashku me rritjen ekonomike mund të sjellë dëme të pariparueshme në kulturën kombëtare nëse nuk ka një mbeshtjetje shtetërore për të ngritur ndër të tjera, edhe artizanatin e saj. Po si bëhet? Shumë thjeshtë. Pak vemendje, shumë përkushtim, mbështetje të artizanatit vendas, ndalim i mallrave të huaja. Një periudhë subvencion për artizanët vendas, lehtësim taksash dhe trajnime për një brez të rinj artizanësh. Një dyqan në Pazarin e Gjirokastrës mund të mbeshtesë ekonomikisht 5 deri në 10 familje që merren me artizanat. Imagjinoni çfarë force e madhe për Qytetin mund të jetë Pazari nëse shikohet seriozisht si një aset i rëndësishëm ekonomik dhe kulturor.