FOTO: Enigma e vilës në kompleksin luksoz ku jetojnë prej marsit 2019, deklarata e pasurisë e Bashës dhe bashkëshortes shkakton polemika

Në 8 shtator 2021, kreu i PD, Lulzim Basha ka dorëzuar pranë Inspektoratit të Lartë të Deklarimit dhe Kontrollit të Pasurive, deklaratën e pasurisë, në kuadër të detyrimit ligjor për deklarimin e të gjitha pasurive para betimit si deputet, pas ndërprerjes së mandatit në mars të vitit 2019.

Deklarata e pasurisë që mban firmën e Lulzim Bashës dhe bashkëshortes së tij Aurela Basha është publikuar sot në media.

Aty shihet se Basha deklaron vetëm pagën si kryetar i PD-së në vlerë 1 milionë lekë si dhe mbulimin e shpenzimeve në telefon në vlerën 126 mijë lekë po nga PD-ja. Në këtë deklaratë pasurie, kreu i PD nuk deklaron asgjë sa i takon shpenzimeve për banim.

Në dokument nuk ka asnjë shënim as për shpenzime qiraje, as për blerje dhe as për dhurim banese.

Por në tetor të vitit 2019, Lulzim Basha u zhvendos për të banuar në një shtëpi në kompleksin e vilave “Long Hill”, në Tiranë. Asokohe Basha refuzoi të jepte detaje si dhe të publikonte kontratën e qirasë së pretenduar, për jetesën në një shtëpi, në një zonë të tillë të Tiranës, ku qiraja mujore kushton minimalisht 2.5 mijë euro në muaj.

I vetmi shpjegim ishte një deklaratë publike e Partisë Demokratike në 28 tetor të 2019, ku përmes një njoftimi zyrtar thuhej se “Pas disa dëmeve të shkaktuara nga tërmeti, banesa e z. Basha do të duhet t’i nënshtrohet disa punimeve të domosdoshme. Për këtë arsye z. Basha dhe familja e tij janë zhvendosur përkohësisht në një banese me qira…”.

E vetmja mundësi që Lulzim Basha të deklaronte dhe sqaronte raportin e tij me vilën, nëse banonte me qira apo e kishte blerë, ishte deklarimi i pasurisë pranë Inspektoriatit të Lartë të Deklarimit dhe Kontrollit të Pasurive, si një detyrim ligjor. Por, një gjë e tillë nuk ka ndodhur, duke shtuar më tej dyshimet.

Parashikimi ligjor
Ligji nr. 9049 për deklarimin e pasurisë, në nenin 4 parashikon që subjekti deklarues duhet të deklarojë çdo ndryshim në llogaritë bankare dhe të gjendjes cash, si dhe si dhe çdo shpenzim i deklarueshëm, me vlerë mbi 300 000 lekë, i kryer gjatë vitit të deklarimit.

Gjithashtu ligji parashikon detyrimin për të deklaruar edhe dhuratat dhe trajtimet preferenciale, përfshirë identitetin e personit fizik ose juridik, prej nga vijnë apo krijohen dhuratat a trajtimet preferenciale.

Pra, në çdo rrethanë, Lulzim Basha duhet të deklarojë statusin e banesës së re, nëse e ka marrë me qira, e ka blerë, ia kanë bërë dhuratë apo e kanë trajtuar në mënyrë preferenciale, që do të thotë se kanë strehuar pa i marrë pagesë qiraje.

Partia Demokratike zyrtarisht ka deklaruar se Basha jeton me qira për shkak se i është dëmtuar banesa nga tërmeti. Në këto kushte, Basha duket të deklaronte shpenzimet për kontratën e qirasë. Fshehja e pasurisë apo shpenzimeve, refuzimi për deklarim apo mashtrimi me deklaratat e pasurisë përbën vepër penale.

Aurela Basha e papunë
Sipas deklaratës së pasurisë së dorëzuar në 8 shtator në ILDKP, bashkëshortja e kryetarit të opozitës, Aurela Basha, deklaron zero pasuri dhe zero të ardhura. Referuar këtij dokumenti, Aurela Basha është e papunë.

Është hera e parë që nga viti 2005 që Aurela Basha nuk deklaron të ardhura. Nga viti 2005 deri në vitin 2018, Aurela Basha deklaronte deri në 50 mijë euro në vit të ardhura si Drejtore Programesh pranë fondacionit EWPPP në Holandë.

Mungon pasuria e plotë
Në deklaratën e dorëzuar në ILDKP në 8 shtator 2021, Lulzim dhe Aurela Basha duhet të deklaronin pasurinë e plotë që nga viti 2005 deri më sot, për shkak se kjo deklaratë nuk është një deklaratë periodike/vjetore, por deklarim pasurie para fillimit të detyrës.

Ky detyrim rrjedh për shkak se Lulzim Basha dorëzoi mandatin e deputetit në mars të vitit 2019, ku për rrjedhojë, në bazë të ligjit, plotësoi një deklaratë pas largimit nga detyra.

Me zgjedhjen deputet në zgjedhjet parlamentare të 25 prillit dhe marrjen e mandatit të deputetit, Basha duhet të deklaronte të gjitha pasuritë që ka në pronësi bashkë me bashkëshorten, të luajtshme dhe të paluajtshme.

Detyrimi parashikohet në nenin 5/1 të ligjit Nr. 9049, datë 10.4.2003, për kontrollin dhe deklarimin e pasurive. Një gjë e tillë nuk ka ndodhur.

Fakt është që familja Basha tani jeton në një vilë dykatëshe të kompleksit nga më të pëlqyerit në kryeqytet, i njohur si kompleksi i “vilave të Papulit”, emër i marrë nga ndërtuesi i tyre Agron Papuli.

Në fotot më sipër shihet automjeti i Bashës duke hyrë në kompleks si dhe pamje nga Long Hill.

Në një emision televiziv në RTSH, Basha pretendoi se po rri me qera aty. I pyetur nga gazetari se pse nuk e publikon kontratën e qirasë, Basha i ka bërë “bisht” pyetjes duke thënë se të gjithë e dinë kontratën (!).

Pjesë nga biseda:

Gazetari: Mund të botoni një faksimile të kontratës dhe nuk do të merreshin më me ju…

Basha: Kontratat dhe gjithçka tjetër janë të depozituara dhe këto i dinë fare mirë të gjithë. Qeveritarët dhe tellallët e tyre i dinë fare mirë sepse gjithçka është publike.

Gazetari: Ku është bërë publike?

Basha: Ajo që po ju them është kjo, e gjitha është një gënjeshtër, pa asnjë bazë në realitet dhe që ka një qëllim të vetëm: të heqë vëmendjen, në rradhë të parë nga lista e gjatë e dështimeve të Edi Ramës dhe së dyti nga të vërteta e hidhura të shqiptarëve…

i.b./ dita