FOTO: Vritet pronari shqiptar i hotelit ‘Aleksandër Palace’ në Shkup, 80 plumba në mesnatë mbi makinën e tij, vdes edhe i riu që e shoqëronte

Kamer Idrizi, 42 vjeç, banues në Shkup dhe me origjinë nga Shqipëria është ekzekutuar me breshëri kallashnikovi bashkë me kushëririn e tij, duke përgjakur natën e fundit të muajit të Ramazanit.

Ngjarja e rëndë ndodhi mesnatën e kaluar në lagjen Butel të Shkupit, në kryqëzimin e bulevardeve “Bosnjë dhe Hercegovinë” dhe “Hristijan Todorovski-Karpos”.

Idrizi po udhëtonte me automjetin e llojit ‘Golf 7”, bashkë me të afërmin e tij, të riun 22 vjeç, me inicialet E.I., në momentin që persona të maskuar i bënë pritë dhe e qëlluan me mbi 80 plumba kallashnikovi.

Idrizi vdiq në vend, ndërsa 22-vjeçarin e prekën gjashtë plumba. Ai u dërgua në urgjencë për të marrë ndihmën e nevojshme mjekësore, por fatkeqësisht ndërroi jetë.

Deri më tani nuk ka asnjë të arrestuar për krimin e dyfishtë. Pista ku po hetohet është e shkuara e errët e vetë Idrizit.

Policia dhe grupi hetimor kanë shkuar në vendin e ngjarjes, kanë rrethuar zonën dhe kanë mbledhur prova të cilat mund të çojnë në identifikimin e autorëve.

Kamer Idrizi njihej si investitor i fuqishëm, por edhe person problematik në zonë. Në 2019, disa persona të maskuar,  hapën zjarr ndaj hotelit të tij ‘Alexander Palace’ në Shkup. Fatmirësisht Kamer Idrizi bashkë me miqtë e tij Jeton Krivanjeva, Afrim Sulimani dhe Ensar Iseni, shpëtuan.

Dyshohet se mes tyre ka pasur konflikte për trafikun e lëndëve narkotike.

Në profilin e tij në ‘Facebook’ mund të shihen foto të shumta të Idrizit me zyrtarë të lartë të partisë Lidhja Socialdemokrate e qendrës së majtë në Maqedoninë e Veriut. Gjithashtu ai ka foto nën shoqërinë e Kryetarit të komunës së Butelit Smilevskin, drejtorin e ERFR, zyrtarë lokalë etj.

 

n.s. / dita