FOTO LAJM: Më në fund! Bashkia ndërhyn edhe në shkollën Kristaq Rama. Veliaj: Përdori emrin e artistit për të zaptuar

UPDATE – Aksionit të Bashkisë së Tiranës për lirimin e hapësirave publike në Njësinë Administrative nr. 5 nuk i ka shpëtuar as shkolla “Kristaq Rama”.

Për rreth 15 vite ky objekt arsimor i ka shpëtuar çdo fushate dhe ndërhyrje nga ana e bashkisë apo të qeverisë.

Sa herë flitej për ndërhyrje dhe lirimin e hapësirave publike, sfida e madhe për të gjithë ishte lirimi i trotuarit që kjo shkollë ka uzurpuar në zonën e Komunës së Parisit. 

Ndërhyrja e bashkisë aty u pa nga qytetarët edhe si një bankë prove për kryebashkiakun Veliaj, të cilën me sa duket ai e ka kaluar me sukses.

Siç shihet edhe nga fotot, ditën e sotme, Bashkia e Tiranës ka detyruar prishjen e ndërtesës, e cila ka nisur te cmontohet nga kati i dytë i shteses mbi trotuar.

Eshtë dita e gjashtë e aksionit të Bashkisë së Tiranës për lirimin e hapësirave publike në Njesine 5.

Aksioni është i ndarë në tre faza, ku fillimisht bëhet prishja e hapësirave të zëna, pastaj bëhet rehabilitimi dhe në fund Bashkia e Tiranës bën rikualifikimin e zonës në funksion të banorëve.

Kryebashkiaku Erion Veliaj, gjatë prezantimit të administratorit të njësisë Bërzhitë, Refik Velia, foli mbi rastin e shkollës “Kristaq Rama” në zonën e Komunës së Parisit në kryeqytet.

“Shkolla ‘Kristaq Rama’ është duke u çmontuar si ndërtim pa leje në Tiranë. Një shkollë e cila mbante emrin e artistit të madh, por e keqpërdorte atë si licencë për të zaptuar hapësirën publike, siç është trotuari i rrugës te ‘Komuna e Parisit’”, deklaroi sot Veliaj.

Ai theksoi se me të mbaruar aksionin e lirimit të hapësirave të zënë publike në të gjitha njësitë e Tiranës qytet, bashkia do të vijojë me aksionin e ligjshmërisë edhe tek njësitë e tjera.

“Prishja e asaj godine tregon se jemi të vendosur që të mos bëjmë asnjë lëshim dhe për të mos pasur asnjë tolerancë, pavarësisht se në çfarë ujërash dikush e kamuflon paligjshmërinë e vet. Kjo do të vlejë për të gjithë territorin e Tiranës, përfshirë edhe për Bërzhitën”, theksoi Veliaj.

Kryetari i Bashkisë së Tiranës kërkoi nga administratorët që të bëhet një inventar i të gjithë paligjshmërive dhe nevojave për investime, për t’u siguruar që në buxhetin e ri të përcaktohen investimet për të cilat kanë realisht nevojë njerëzit.

Më tej, kryebashkiaku Veliaj njoftoi se Fondacioni Amerikan ka marrë përsipër për ta shndërruar në pikë turistike shpellën e Pëllumbasit, ndërsa Fondi Shqiptar i Zhvillimit rikonstruksionin e rrugës.

Lidhur me aksionin qytetar për pastrimin e Tiranës në 4 shtator, Veliaj kërkoi që administratorët të jenë në krye të shtabeve për pastrimin e zonave të tyre.

“Duhet të bëjmë maksimumin që, teksa afron ajo datë, njerëzve t’u tregojmë se po bëjmë maksimumin, por megjithatë na duhet edhe ndihma e tyre. Gjatë kësaj kohe duhet të piketoni zonat e ndotura”, tha kreu i Bashkisë.