Franca përdor Nenin që nuk është përdorur kurrë më parë në Bashkimin Evropian

Franca ka intensifikuar sulmet ajrore në Siri kundër bazave të Shtetit Islamik.

Për këtë arsye, ministri i Mbrojtjes Jean-Yves Le Drian ka kërkuar nga vendet e Bashkimit Evropian pjesëmarrje më të madhe ushtarake në disa rajone ku po zhvillohen operacionet.

“Franca nuk mund të jetë e vetme në këto rajone”, theksoi Le Drian, sipas këshilltarëve të tij, gjatë një mbledhje të ministrave evropiane të Mbrojtjes në Bruksel.

Ministri francez përmendi nenin 42-7 të traktateve evropiane, që parashikojnë solidaritet në rast agresioni kundër një vendi të BE-së. Është hera e parë që një anëtar i BE-së përmend këtë nen, i ngjashëm në filozofinë e tij me nenin 5 të traktatit të NATO-s të cilin e përdori SHBA-ja pas atentateve të 11 shtatorit, aktivizimi i të cilit solli ndërhyrjen e Aleancës së Atlantikut në Afganistan.

Thirrjes i janë përgjigjur menjëherë vendet anëtare. Shefja e diplomacisë evropiane, Federica Mogherini bëri të ditur mbështetjen e të gjitha vendeve anëtare.

“Sot, Bashkimi Evropian nëpërmjet zërit të të gjitha shteteve anëtare, ka shprehur në mënyrë unanime mbështetjen më të madhe dhe dispozicionin e tyre për të dhënë ndihmën e kërkuar”, theksoi Mogherini, në një konferencë të përbashkët shtypi.

“Ky është një nen (42-7) që nuk është përdorur kurrë më parë në historinë e Unionit tonë”, nënvizoi Mogherini.

Megjithëse nuk është marrë ende një vendim zyrtar, Mogherini deklaroi se ky është një akt mbështetjeje. /Dita/