Beckenbauer, “non grata” në Botëror

“Franz Beckenbauer nuk lejohet të marrë pjesë në asnjë aktivitet futbolli. Kjo përfshin edhe gjëra të tilla, si ftesa për të ndjekur ndeshje futbolli, apo vizitë private të çdo lloj pritjeje”, tha Alan Sullivan, zëvendësshef i Komitetit të Etikës të FIFA-s. Komisioni e ka bllokuar për 90 ditë ish-anëtarin ekzekutiv të FIFA-s Franz Beckenbauer. Ai akuzohet se nuk i është përgjigjur një pyetësori të dërguar nga Komiteti i Etikës në lidhje me procesin për vendimin që Botërori 2018 të zhvillohet në Rusi dhe ai 2022 në Katar. FIFA e kundërshtoi versionin e Beckenbauer-it se ai kishte kërkuar një përkthim të pyetjeve nga anglishtja në gjermanisht, por kjo nuk është bërë. 68-vjeçarit i janë kërkuar në mënyrë të përsëritur informacione, njofton FIFA, gjë që mund ta bënte ose “në një intervistë personale, ose duke iu përgjigjur pyetjeve me shkrim, që janë bërë në anglisht dhe gjermanisht. Beckenbauer dëshiron të presë zhvillimet e ditëve të ardhshme, para se ai të vendosë përfundimisht nëse do të shkojë për Kupën e Botës në Brazil apo jo, tha këshilltari i tij Marcus Hoefl. Vetë Beckenbaueri kishte thënë më parë në një intervistë me gazetën “Bild-Zeitung”, se ai nuk ka ndërmend të udhëtojë për Kupën e Botës në Brazil. “Unë mendoj se nuk jam më i mirëpritur tek FIFA”