Gugash Magani ka identifikuar frikën si armikun kryesor të Tiranës në momentet më të këqija të historisë së saj. Trajneri peqinas, pasi ka zhvilluar stërvitjen e parë me bardheblutë, është shprehur se skuadra e tij duhet të vrasë pikërisht frikën për të ecur përpara. Tirana ka pësuar pesë humbje radhazi dhe çdo hap i gabuar rrit natyrshëm frikën te skuadra, gjë që trajneri i ri kërkon ta luftojë që në fillim. “Tirana duhet të vrasë frikën për të dalë nga kjo gjendje e vështirë”, tha dje trajneri pasi nisi punën me bardheblutë. “Rezultatet negative kanë krijuar një farë frenimi dhe kjo gjë duhet të ndryshojë. Ne duhet t’i marrim ndeshjet me radhë, duke e konsideruar secilën prej tyre si një finale”. Në fundin e renditjes, Tirana është skuadra më e rrezikuar për të rënë nga kategoria, por Magani siguron se një gjë e tillë nuk do të ndodhë. Për të nuk është hera e parë që merr një skuadër në vështirësi, duke kujtuar Flamurtarin e vitit 2010. “Për mua është kënaqësi që të jem trajner i Tiranës, edhe pse skuadra është në vendin e fundit. E them me bindje se Tirana nuk do të bjerë nga kategoria, pasi nuk është skuadër pa cilësi. E kam provuar edhe më parë të marrë drejtimin e skuadrës së fundit në renditje, në 2010, me Flamurtarin. Edhe atëherë ia dolëm mbanë të qëndronim në Superiore”, tregon Magani.