FSHF reagon ndaj Brahimit: S’lejojmë askënd të na cënojë dinjitetin

Deklarata e Mërgim Brahimit, që akuzonte personalisht Redi Jupin dhe FSHF-në për mënyrën e tyre të sjelljes, për “mashtrim dhe tradhëti”, si shkak i largimit të tij nga kombëtaret e Shqipërisë, ka marrë sot një reagim zyrtar.

Përmes faqes së FSHF-së, ky institucion nënvizon se i ka krijuar kushte maksimale kujtdo që ka pranuar të luajë për fanellën kuqezi, si në nivele moshash, ashtu edhe në nivelin më të lartë, që është ekipi kombëtar:

“Ky është qëndrimi ynë parimor, njerëzor dhe profesional, në cdo rast. Por, kurrsesi, Federata Shqiptare e Futbollit nuk do të lejojë që të cënohet dinjiteti dhe personaliteti i njerëzve që kontribuojnë në maksimum për futbollin shqiptar, i specialistëve të përkushtuar dhe i vetë institucionit të futbollit.

Ne vlerësojmë punën dhe kontributin e Redi Jupit si ish-lojtar i ekipit kombëtar, si drejtues i Sektorit të Ekipeve Kombëtare dhe si trajner i Ekipit U-21”.